Hižo dlěje hač dwě lěće prócujetej so Koslowčance Wórša Pašcyna a Lucija Grellertowa wo pomnik w swojej ródnej wsy. Dopominać ma wón na struchły čas a na wjesnjanow, kotřiž njejsu so z Druheje swětoweje wójny nawróćili.

Třinaće Koslowčanow je za čas Druheje swě­toweje wójny zwonka domizny žiwjenje přisadźiło. Na nich ma pomnik do­pominać, ale tež na bitwy we wsy kónc hrozneje wójny 1945. Měnitej, zo njeměli na stawizny zabyć, dokelž tež dźensa měr na swěće garantowany njeje. Pomnik měł zdobom napominać hidu a sebičnosć njedopušćić.

Wórša Pašcyna a Lucija Grellertowa pak nochcetej měć pomnik podobny tym, kotrež na wsach powšitkownje widźimy. „Chcemy wuměłsku twórbu, kotraž ze swójskim wurazom na dóńt wsy a wjesnjanow pokazuje. Pomnik ma so orientować na začuću wo spomnjeću dźensnišeho časa“, wonej rozłožujetej. Póńdźe-li po planje iniciatorkow, bychu pomnik klětu w Koslowje postajili – 75 lět po surowych wojowanjach we a wokoło Koslowa.