Gmejna ma wjele nadawkow a starosćow
Njeswačidło (JK/SN). Na swojim wčerawšim posedźenju su Njeswačanscy gmejnscy radźićeljo doskónčnje wobzamknyli, kak nałožić lětuše pawšalne spěchowanje 70 000 eurow Swobodneho stata Sakskeje k skrućenju wjesnych kónčin. Kaž SN hižo rozprawjachu, inwestuja hłowny dźěl do wobnowjenja gmejnskich bydlenjow a do noweje třěchi za wohnjowu woboru w Zarěču. Wutwar Kastanijoweho puća na dobro šulskich dźěći a přinošk za słónčny škit w zakładnej šuli stej tohorunja předwidźanej. Jeli najebać krute kalkulowanje tola hišće něhdźe něšto zbywa, wužiwaja tež te pjenjezy za wobnowjenje bydlenjow.
