Časy rumnostnje wobmjezowaneho horta we Worklečanskej šuli su nimo. Loni po jutrach započachu nowy hort twarić. Wot přichodneho šulskeho lěta budźe wón dźěćom wulkotne wuměnjenja skićić.
Worklecy (SN/MWj). 20. awgusta chcedźa we Worklecach nowy hort oficialnje přepodać. Zaćahnyć pak móhli do njeho hnydom, přetož dom njeje jenož dotwarjeny, ale tež dospołnje wuhotowany. „Rjemjeslnicy su swoje dźěła sčasom dočinili, tak zo móžemy hort kaž planowane w nowym šulskim lětom wužiwać“, wjeseli so wjesnjanosta Franc Brusk (CDU). Runje tak spokojom kaž wón su zawěsće tež dźěći a kubłarki, kotrež budu dom wužiwać. Na nje čakaja wulke swětłe rumnosće za najwšelakoriše zaběry. Mjez druhim su stwy předwidźane za domjace nadawki, za pohibowanje, hrajkanje, paslenje, za twarjenje z lego-klockami a za wotpočowanje. Najwjetša rumnosć, w kotrejž je samo beamer zatwarjeny, je z mobilnej sćěnu wotdźělena wot kuchnje, hdźež budu holcy a hólcy tež raz warić móc. Mjeztym zo je delni poschod oranžowje wuhotowany, přewahuje na hornim zelena barba. Wězo změja tež kubłarki swoju stwu a nawodnica běrow.
