Delanska gmejna zawěsća sej fachowu pomoc za hladanje wodźiznow
Ralbicy (JK/SN). Na posedźenju gmejnskeje rady Ralbicy-Róžant w juniju předstaji inženjer Andreas Stowasser z planowanskeho běrowa w Radebeulu projekt a koncept, kak wodźizny 2. rjadu w delanskej gmejnje hladać a wobhospodarjeć. Wona ma so wo cyłkownje 30 kilometrow tajkich starać. Z aktualnym spěchowanjom Swobodneho stata Sakskeje za wudźeržowanje tajkich wodźiznow we wobjimje 500 eurow na kilometer su tež wotpowědne zaměry a wobhospodarjenske naroki zapisane. Gmejna njemóže tajkim fachowym žadanjam hižo sama wotpowědować.
Radebeulski běrow komuny podpěruje, nastajić plany hladanja wodźiznow, a pomha tež přisłušnosće a wobsydstwowe poměry rozrisać. Wotpowědne zrěčenje z běrowom ma wšě tute wobstejnosće wobkedźbować a přiwšěm gmejnje swobodu při postupowanju wostajić. Inženjerski běrow pak stara so přichodne lěta wo fachowy přewod a poradźuje gmejnu, kak ma wodźizny prawje wobhospodarjeć.
