Runje nětko za čas korony, hdyž njesměmy so wjace hač 15 kilometrow wot swojeho bydlenja zdalować, je wuchodźowanje přewšo wažne. Tak móže wokoło Pazličanskeho wulkohata pućować jara zajimawe a powučne być, a to nic jeno dźěćom.
Němske Pazlicy (mwe/SN). Při Pazličanskim haće wšelake družiny ptakow hnězdźa, tež dźiwje husy a kački, kaž na informaciskich taflach steji. Serbske napisy tam bohužel pobrachuja, tež za nje by dosć městna na taflach było.
Čara wokoło hata je šěsć a poł kilometra dołha, a widźeć móžeš tójšto. Nětko, hdyž su stanowanišća kaž při Módrej Adriji w Chrósće a w Nižej Wsy zawrjene, je te w Němskich Pazlicach dale přistupne. Wšako tam tón abo tamny stanowar tež w zymje přebywa. Tak su rozmołwy z nimi wuchodźowarjam zajimawa wotměna. Wšědnje tež wobydlerjo Kamjenca a bliskich wsow swoje koła běhaja. Samo z Drježdźan, Pirny a Mišna ludźo přijědu, zo bychu so wottam z kolesom po Krabatowej šćežce do Kulowa podali a so přez Koćinu, Šunow, Ralbicy, Róžant a Pěskecy zaso nawróćili.
