Na najwšelakoriše wašnje je Trjebinska gmejna loni srědki z komunalneje pawšale nałožowała. Zo su pjenjezy derje wužiwali, nichtó njeprěje. Ale kak je so to stało, so někotrym njelubi.
Trjebin (AK/SN). Pjenjezy z pawšale Swobodneho stata Sakskeje k zesylnjenju wjesneje kónčiny je Trjebinska gmejna loni w Trjebinje a Miłorazu mnohostronsce zasadźiła. To podšmórny wjesnjanosta Waldemar Locke (CDU) minjeny štwórtk na posedźenju gmejnskich radźićelow. Wjetšina z nich je wužiwanje srědkow dodatnje wobkrućiła. Wosom radźićelow hłosowaše za to, třo přećiwo tomu a dwaj so hłosa wzdaštaj.
