Pućowanje je dźeń a woblubowaniše. Runje z tuteje přičiny nasta loni prěni raz tak mjenowany „Slaviamarsch“. Je to organizowane pućowanje na čarje 50 kilometrow, kiž ma so w běhu 12 hodźinow absolwować. Njeje potajkim njedźelniše wuchodźowanje, ale za mnohich překročenje wosobinskich hranicow. Tola přiwšěm njeje to wubědźowanje, ale skerje wjeselo za wšitkich.

Sobotu rano, krótko po sedmich, zetkachu so sportowče a sportowcy na Hórčanskim sportnišću. Na hrajnišću, hdźež hewak koparjo Zeleno-běli Hórki za bulom honja abo konjacy sportowcy sportuja, steješe wulki módry wrotowy wobłuk, kiž signalizowaše startowy teritorij. Dohromady 184 zmužitych chcyše so na kołoběh přez dwurěčnu kónčinu podać. Najmłódši mjez nimi bě 11 lět, najstarši nimale 70. A wobaj dokónčištaj čaru.