SJ Chrósćicy –

Rotacija Drježdźany 2:4 (1:0)

Zestawa domjacych: Králíček – Mark, Runt, Kreuz, Janca, L. Zahrodnik, M. Zahrodnik (82. Matik), G. Zahrodnik, Krawc (70. Hawš), Młynk, Bogusz

Njedźelu dojědźe sej třeći tabulki Rotacija Drježdźany do Chrósćic. Pod wurjadnymi wuměnjenjemi změnichu Chróšćenjo tróšku swoju taktiku a startowachu ofensiwnje z třomi nadběhowarjemi. Přiwšěm pak pokazachu hosćo, zo njesteja bjez přičiny w hornim dźělu tabulki a kombinowachu derje w swojich rjadach. Domjacy derje přesuwachu a hosćom mało městna w poslednim dźělu hrajnišća skićachu. Tak pokaza SJC efektiwnosć. Pawl Krawc so na lěwym křidle přesadźi a flankowaše do šěsnatki. Jan Bogusz bě před wrotarjom při bulu a jón k 1:0 w 21. min. do wrotow zhłójčkowa. Hosćo pak njedachu so wot toho wottrašić a dale na wrota domjacych tłóčachu. Hustohdy pak startowaše nadběhowar přezahe, tak zo w nimohrě steješe abo zakitowarjo wokoło Floriana Kreuza třělwam zadźěłachu.