Inwestuja wjele pjenjez do zjawneho bliskowobchada

Malešecy (SN/MWj). Za něšto dnjow započnje Malešanska gmejna jednu ze swojich wulkich lětušich inwesticijow zwoprawdźeć. Wot přichodneje póndźele chcedźa w štyrjoch wsach dohromady sydom busowych zastanišćow tak přetwarić, zo wone hižo žane zadźěwki nje­změja. „Z tymle wutwarom přinošujemy k polěpšenju wužiwanja zjawneho bliskowobchada w našej wjesnej kónčinje a polěpšimy zdobom wobchadnu wěstotu potrjechenych zastanišćow. Runo­časnje zwyšimy tak atraktiwnosć našeje gmejny jako bydlenske městno“, praji wjesnjanosta Malešanskeje gmejny Matthias Seidel (CDU).

Wutwarić chcedźa zastanišća stajnje do wobeju směrow w Lemišowje, Połpicy a w Skanecach kaž tež jedne w Stróži. Na wšitkich městnach ma so čakanski ­wobłuk wobstejnosćam přiměrić. Dale natwarja moderne čakanske budki, hdźež móžeš so tež posydnyć. Nimo toho nastaja pódla zastanišća metalowe ­dźeržaki, zo móhli wobydlerjo tam swoje koleso přizamknyć a potom z busom ­dale jěć.