Čorny Chołmc (SR/SN). W bróžni Krabatoweho młyna přepodachu srjedu kluče za nowe dowolowe domčki. Přitomna bě nimo Wojerowskeho wyšeho měšćanosty Torstena Rubana-Zeha tež statna ministerka za kulturu a turizm, Barbara Klepsch. Wona wuzběhowaše w swojej narěči wuznam Krabatoweho młyna za region, wšako hižo přirunujomneho městna w Sakskej njeje. „Twar nowych dowolowych domčkow je wuběrna kročel. Móžeće hordźi na tutón wukon być“, wona doda.

Tež jednaćel bydlenskeje towaršnosće Wojerecy a twarski knjez Steffen Markgraf zhladowaše w swojej narěči spokojom na projekt. Za přenajerja z Wojerec je projekt cyle nowe polo skutkowanja. Dohromady je cyły projekt tři lěta trał. Nastało je dohromady pjeć domčkow na přestrjeni 500 kwadratnych metrow. Bydlenska towaršnosć bě 1,3 miliony eurow inwestowała, Krabatowy młyn 250 000.

Tři domy su z 60 kwadratnymi metrami za štyri wosoby koncipowane, tamnej dwaj matej bydlensku přestrjeń 90 kwadratnych metrow a skića maksimalnje šěsć wosobam městno. Někotre z domow maja samo swójsku sawnu. Přenajeće domow planuja wot spočatka februara.