Wojerecy (SN/MWj). 121 284 wopytowarjow su loni we Wojerowskim zwěrjencu a susodnym hrodźe zličili. To je trochu mjenje hač 2022, jako registrowachu 126 348 wopytowarjow. Dotal najwjace hosći mějachu 2019 z něhdźe 140 000 wopytowarjemi. „Přiwšěm je lońši wuslědk po dalšim lěće z wužadanjemi a energijowej krizu za nas dobry“, praji jednaćel Wojerowskeho měšćanskeho zawoda za zwěrjenc, kulturu a kubłanje ­Arthur Kusber.

Dołha zyma a mokrota stej start do sezony 2023 poćežiłoj. „Bohužel wuskutkowaše so to tež na jutrowne swjate dny a jutrowne prózdniny, hdyž hewak prěni raz w běhu lěta wjele wopytowarjow přichadźa“, Kusber dale rozłoži. Zwěrjen­cowa šula a muzejowa pedagogika po­staraštej so porno tomu wo rekordaj. ­Dohromady je wjace hač 6 500 ludźi 362 zarjadowanjow wopytało. „To nam pokazuje, kak woblubowanej našej zarjadnišći jako zwonkašulskej městnje wuknjenja stej“, so Kusber wjeseli.