Přisłowo praji „Dobry kóń jenož tak wysoko skoči kaž dyrbi“. Tute je sebi francoska koparska wubranka při europskim mišter­stwje k wutrobje wzała. Wčera wječor přewinychu Belgisku we wosmifinalu 1:0. Wuslědki Francozow w skupinskej fazy běchu 1:0, 0:0 a 1:1. Tónraz drje běchu Francozojo zaso dołho lěpše mustwo, k wjace hač roz­sudnym wrotam pak njedóńdźe. Jónu přińdźe Kylian Mbappé po róžku k wutřělej (14. min.), w kónčnej fazy prěnjeje połojcy bě to potom Aurélien Tchouaméni, kiž dwójce strašnje ze zadnjeho ruma wotzamkny. Belgiskaj nadběhowarjej Loïs Openda a Romelu Lukaku wisaštaj w prěnjej połojcy dospołnje w powětře. Zhromadnje přińdźeštaj wonaj na runje 16 kontaktow z hrajnym nastrojom. To so tež hač k wuměnje Opendy po něšto wjace hač hodźinje njezměni. Francoska třěleše husto, ale zrědka na wrota. Wot 20 francoskich třělwow měrještej so jenož dwě na wrota Belgičanow.