Wopytowarjo Europeady 2024 su sej přezjedni: Tajku wulkotnu kulisu serbskich fanow z najlěpšej naladu kaž wčera w Bredstedće dotal hišće widźeli njejsu. Na tym njeje tež poražka serbskeje muskeje wubranki 1:3 přećiwo mustwu němskeje mjeńšiny w Pólskej ničo změniła. Dźeń wuklinči ze zabawu, kotruž su Serbja na minjenych Europeadach hižo pěstowali.

Bredstedt (SN/MkWj). Bórze po zahwizdanju koparskeje hry přećiwo wubrance z Pólskeje bě jasne, zo nimaja serbscy koparjo wólnje zestajenu wubranku před sobu, ale mustwo, kotrež je derje zahrate a kotrež je snano samo kruty hrajerski cyłk. Němcy z Pólskeje hrajachu wot spočatka sem z wulkim ćišćom. Serbska wubranka so nadběham dołho wobaraše. Hakle w 51. min. prěni króć we wrotach Serbow „klinkaše“.