Wojerecy (KD/SN). Popołdnjo za swójby Wojerowskeje župy „Handrij Zejler“ sposrědkuje hižo dlěši čas młódšim a staršim wopytowarjam serbsku rěč a kulturu dwurěčneje Łužicy. Z tymle zaměrom wopytuja čestnohamtscy akterojo stajnje rozdźělne městna w regionje. Tak běchu hižo w Ćisku a Kulowje, rozprawja co-županka Gabriela Linakowa. Minjenu njedźelu wotmě so tajke popołdnjo za swójby w „La Galeria“ w Němcach.

Spočatnje holcy a hólcy Němčanskeje Witaj-pěstowarnje Pumpot nazornje pokazachu, kelko serbskeho su z pomocu metody dospołneje imersije hižo nawuknyli. Jedyn z jich spěwow jednaše wo žiwjenju husaceje swójby w běhu lěta. W dalšej – dwurěčnej – pěsni předstajichu wšelake powołanja. Starši, dźědojo a wowki so wočiwidnje nad wuspěchami swojich małych lubuškow wjeselachu. Předewšěm dźěći z dwurěčnych swójbow z pomocu Witaj-koncepta rěč a kulturu swojich prjedownikow nawuknu, rozłoži młoda mać Katharina Korchowa.