Wojerecy (SiR/SN). Zachod do ponowjeneje Łužiskeje kupjele we Wojerecach je přijomny a komfortabelny. Nutřka je ­rjenje ćopło. Žona chce swoje wěcy do ­faška zamknyć. Matthias Brauer ju na to skedźbnja, zo su faški za hódnotne wěcy myslene. Jednaćelej Łužiskeje kupjele při tym napadnje, zo jednej z rostlinow kmany hornc pobrachuje. Tu a tam su sobudźěłaćerjo pilnje při dźěle. Něštožkuli hišće na swojim městnje njeje. 27. decembra bě druhi dźeń, zo je Wojerowska kupjel na probu dźěłać započała. Matthias Brauer by poprawom dowol měł a móhł doma być. „Sym woprawdźe čakał, zo mje kolegojo zazwonja, dokelž něšto njefunguje. Ale ně. Mějachmy spokojnych hosći a lědma problemy. To nas zwjesela.“

Wotewrjene su tuchwilu dožiwjenski wobłuk z basenkom za swójby, suwadło, wobłuk za dźiwju wodu, wobstejacy 25 metrow dołhi basenk a wonkowny dźěl sawny. Poběhnje-li wšitko po planje, chcedźa kónc januara nowowuhotowanu sawnu wotewrić. Do panoramoweje sawny su hižo nowe ławki z drjewa wosycy (Espe) zatwarili. Te pječa dlěje dźerži hač tropiske drjewo a tež we Łužicy rosće, Matthias Brauer rozłoži.