Běła Woda (AK/SN). Zestawa stronow a wolerskich skupin w Běłowodźanskej měšćanskej radźe so změni. W gremiju z 22 čłonami wutwori so nowa frakcija z mjenom Zhromadna frakcija. Jej přisłušeja Ronald Krause (SPD), Thomas Krause (CDU) a Rico Jung (Změna nětko). Tole zdźěli Ronald Krause na zašłym posedźenju měšćanskeje rady. Jako štyri najwažniše zaměry noweje skupiny mjenowaše wón wurunany hospodarski plan města, strukturnu změnu jako šansu wobhladować, zmóžnić swójbam přichilene a zapłaćomne bydlenje a žiwjenje kaž tež ­žane zwyšenja dawkow.

Z nowej frakciju so SPD z měšćanskeje rady zhubi, runje tak zjednoćenstwo Změna nětko. CDU změje jenož hišće dwě městni město dotalnych třoch. „W přichodnych lětach čakaja na nas wažne rozsudy. Za to trjebamy stabilne wjetšiny“, rozłoži Ronald Krause pozadk, zo so nowa frakcija wutwori.