Budyšin. Přespěšni šoferojo a ći, kotřiž čerwjenu amplu njewobkedźbuja, su Budyskemu wokrjesej w lěće 2024 dohromady wjace hač 3,3 miliony eurow do kasy wobradźili. To bě něhdźe 160 000 eurow mjenje hač lěto do toho.

Najpilnišo dźěłał je stacionarny błyskač w Póckowach. Wón je loni 6 700 wobchadnych hrěšnikow fotografował. Kasy wokrjesa je to na wšěch 196 000 eurow wunjesło. Na druhim městnje slěduje stacionarny błyskač při zwjazkowej dróze B 6 w Błócanach pola Bukec. Tam je nimale 5 200 drohich fotow nastało, z čehož měješe wokrjes wunošk 165 000 eurow. Třeće městno pilnych błyskačow wobsadźi tón při B 96 w Rašowje, hdźež je něhdźe 4 000 wobrazow nastało. Po­trjecheni šoferojo zapłaćichu za nje cyłkownje 127 000 eurow.

Najwjetšu měrjenu spěšnosć we wsy docpě loni šofer na B 6 w Błócanach. Při dowolenych 50 km/h lepi błyskač jeho ze 144 km/h. Za to měješe wodźer 800 eurow pokuty płaćić, dyrbješe tři měsacy nóžkować a dósta dwaj dypkaj w Flensburgu.