Ćisk (JT/SN). Runja druhim wsam srjedźneje Łužicy su minjenu sobotu tež w Ćisku camprowali. Hromadźe ze žonami a mužemi ze wsy su so Ćišćanscy młodostni na puć podali, tak kaž běchu to jich předchadnicy w zašłych generacijach činili. Jenož předrasćenja su so změnili. Cyłe skupiny jako ryćerjo, soniny abo zwěrjata wonkowny wobraz camprowanja postajowachu. Samo štrusarjow w serbskej drasće, kotřiž z hłownej kasu w rukomaj wšitko organizowachu, su tónraz žony podpěrali. Cyle tradicionalnje pak bě tež jejowa žona pódla. Do róle saznika, kiž mjezwoča přihladowarjow a wobydlerjow ze sazami pomóra, bě Domenic Ludwig zalězł.
Dokelž je Ćisk w minjenych lětach rozrostł, traje camprowanje mjeztym něhdźe dźesać hodźin. Dohromady bě 60 camprowarjow po puću, zo bychu pjenjezy a jeja nazběrali. Za wopyt w Małym Ćisku wužichu konjacy zapřah Forchec swójby. Tón pak bě tež hewak wužitny, wšako na njón wšitke nazběrane jeja połožichu. K posylnjenju poskićichu wobydlerjo zakuski. Wo snědań postara so Köhlerec/Modschingec swójba. Wobjed organizuja hižo wjele lět Herrmannecy.
