Radwor (SN/MkWj). Na přewšo zajimawu jězbu do Georgiskeje a Nepala móžachu so wšitcy podać, kotřiž běchu wčera wječor do Radworskeho „Słodeńka“ přišli. Tam přednošowaše Syman Pöpel wo swojich dožiwjenjach na pućowanju po krajomaj. 33lětny wučer Radworskeje wyšeje šule měješe sep fotow spřihotowanych, z kotrymiž w bohatej ličbje přichwatanych wirtuelnje na swoje jězby sobu wza.

Hižo jězba do Georgiskeje, na kotruž bě so Syman Pöpel loni z towaršom zwažił, ludźi putaše. Pućowanje na 5 000 metrow wysoke hory njebě jenož ćělne wužadanje. Lědma štó z přitomnych móžeše sej předstajić, kak móže čłowjek w sněze stan stajić a tam přenocować. Přednošowar pak měješe tež tójšto fotow na wulkej ­wobrazowce, z kotrymiž žiwjenje jednorych ludźi we wotležanych kónčinach zwobrazni.