Wojerowčenjo chcedźa Wólnočasny kompleks wuchod (FKO) zdźeržeć

Wojerecy (AK/SN). Zajimowani Wojerowčenjo běchu sobotu dopołdnja na wobydlerske zarjadowanje do Sportoweho foruma při Nišćanskej dróze přeprošeni, zo bychu swoje měnjenje zwuraznili a w dźěłarničce za idejemi pytali, kak móhł so stary wólnočasny a sportowy kompleks na wuchodźe města Wojerec FKO w přichodźe wužiwać. Jasnje so woni za jeho zachowanje wuprajichu. Město Wojerecy měło kompleks modernizować, pře- a wutwarić a to z wosebitym fokusom na potrjeby sportowych towarstwow kaž tež ludoweho sporta, tak rěkaše jich facit. Za wobhospodarjenje je wotpowědny dołhodobny koncept trěbny. Wuhotowanski koncept chce komunalna wuwićowa přirada hač do 14. junija zdźěłać a na dalšim wobydlerskim zarjadowanju předstajić.