Ludźo njetrjebaja so hižo starosćić, zo so jich domy sypnu

Budyšin (CS/SN). Za Budyskej hasu Pod hrodom wjedźe Młynska hrjebja. Wona je něhdy njeličomne młyny w dole Sprjewje z wodu zastarała. Nastała je někak mjez lětomaj 1535 a 1539. Hižo tehdy dyrbjachu wobydlerjo města hrjebju sobu financować. Po tak dołhim času bě Młynska hrjebja dodźeržana, zdźěla běchu so jeje murje sypnyli. Hrožeše samo strach, zo so někotre z domow Pod hrodom sypnu. „Pola někotrych je kaž dźiw a so zakonjam statiki spřećiwja, zo so ničo stało njeje“, praji Andreas Breuer, šef Klukšanskeje recyclingoweje twzr, kotraž skutkowaše při wobšěrnym saněrowanju hrjebje jako generalny předewzaćel. Spočatk tydźenja su saněrowanu hrjebju zjawnosći přepodali. Firma wudźeržowaše wuski kontakt z wobydlerjemi, wšako słuša Młynska hrjebja k jich ležownosćam. Tohodla dyrbja so woni tež podźělnje na kóštach ponowjenja wobdźělić. Nimo toho wzdachu so woni za čas twarskich dźěłow tež zdźěla swojich zahrodow. Za to twarska firma zahrody a na přikład tež małe rostlinarnje za nich zaso do porjadka staji.