ST Motor Mickten –

Viktoria Worklecy 92 3:0

(25:18, 25:15, 25:19)

Štóž wolejbulowu scenu w Sakskej znaje, tón je hižo do hry wědźał, zo mějachu mužojo ST Viktorije jenož snadne šansy, ze swojeje jězby do krajneje stolicy k Motorej Mickten něšto wužitneho sobu domoj přiwjezć. „MoMi“, tak je skrótšene mjeno přećiwnika, bě w cyłej dotalnej sezonje jenož štyri sadźby přěhrał a steješe z běłym lacom a 39 dypkami z 13 hrow na čole tabulki sakskeje klasy. Lěpšina za Worklečanow pak bě, zo njemějachu absolutnje ničo zhubić.

Tak startowachu sebjewědomje a bjez ćišća do prěnjeje sadźby hry a móžachu hač do 18:15 poměrnje derje sobu dźeržeć. W zašłych hrach Viktorije dosć wuspěšny taktiski srědk tak mjenowaneje „rochady“ njepřinjese w tutym wokomiku bohužel žadyn efekt, tak zo móžachu domjacy swój předskok stabilizować a sadźbu 25:18 dobyć.

Tež w druhim přechodźe pokaza MoMi swoju wulkotnu hrajersku klasu. Spěšnje bě předskok z pjeć dypkami wuhraty, kotryž so hač do kónca sadźby samo hišće na dźesać dypkow powyši. Viktorianojo pak dale wojowachu.