Wojerecy (KD/SN). 30 angažowanych Wojerowčanow běše so w lěće 2022 w tamnišej přiradźe za komunalne wuwiće (KEB) schadźowało, zo bychu zhromadnje ideje za natwar pućowanskeje a kolesowanskeje šćežki „Zelene pasmo“ kołowokoło stareho a noweho města wuwiwali. „Tehdy namakane ideje zwoprawdźa KUB – přirada za realizowanje komunalnych projektow“, praj čłon přirady, jednaćel Wojerowskeje bydlenskeje towaršnosće Steffen Markgraf. Dohromady wosom projektow w zwisku ze „Zelenym pasmom“ chcedźa zwoprawdźić.

Z jednaćelom Łužiskeje kupjele Matthiasom Brauerom a dalšimi pomocnikami je so Markgraf při čołmikowanskim haćiku w bjezposrědnym susodstwje Wojerowskeje kupjele minjeny štwórtk zetkał, zo bychu tam na grilowanskej městnosći a małym hrajkanišću dźěłali. „Na kóncu změjemy tu grilej ze zornowca kaž tež ławki ze samsneho materiala pod stabilnej třěchu“, wón rozłožuje. Hromadźe su na mjezach 25 kwadratnych metrow wulkeje přestrjenje tež ­kerki wosadźeli. Hižo nětko strowi taflička při zachodnych wrótkach hrajkanišća wopytowarjow w serbskej, němskej a jendźelskej rěči.