Budyšin (CS/SN). Rozprawa Budyskeho twarskeho měšćanosty Heika Nowaka wo stawje prócowanjow wuchodosakskich komunow wo elektrifikaciju železniskeje čary Drježdźany-Zhorjelc běše prěni dypk na dnjowym porjedźe zeńdźenja přirady za wuwiwanje města štwórtk tydźenja. Po regionalnej konferency loni w decembrje kaž tež po rozmołwje ze sakskim ministerskim prezidentom srjedź januara wo tutej temje je sej Nowak wěsty, zo je naležnosć we wědomju politiskich zamołwitych kraja a zwjazka zakótwjena a zo wšitcy wobdźěleni akterojo we wuchodnej Sakskej w tutej naležnosći za jedyn postronk ćahnu.
Tójšto ponowjenjow a wuporjedźenjow dróhow steji lětsa na lisćinje twarskich naprawow města, kaž Nowak přiradu w swojej rozprawje informowaše. Mjez druhim chcedźa dróhi při spjatym jězorje, w zapadnym Nowym měsće a we Wulkim Wjelkowje kaž tež Lessingowu hrjebju ponowić.
