Mały Wjelkow (CS/SN). Wjace hač 200 prazwěrjatow „wobydli“ tuchwilu Małowjelkowski park sawrierow. Składnostnje zahajenja sezony 5. apryla su je zamołwići hižo wurjedźili. A tež při pućach a zelenišćach runje intensiwnje dźěłaja, wšako budu tu bórze zaso syły wopytowarjow po puću. Z něhdźe 250 000 hosćimi lětsa liča, zahoritosć za dinosawriery wočiwidnje njepopušći. Prawidłownych wopytowarjow wězo zajimuje, hač změja w parku w nowej sezonje překwapjace nowostki. Haj, tych budźe! Nowa je 100 metrow ­dołha šćežka zmysłow blisko hrajkanišća planetow, na kotrejž móža sej dźěći bosy swět wotkrywać. Wučomnicy zahrodo- a krajinotwarstwa su ju připrawili. Nimo hablow su mjez druhim šćerk, tačałki kaž tež 150 metrow tołsteho powjaza za to wužiwali. Brjuch wulkeho Triceratopsa, do kotrehož móža so wopytowarjo podać, su zamołwići lětsa ponowili. Tam wot­nětka čłowječa postawa hosći wita a jim zajimawostki ze žiwjenja załožićela parka a „nana dinosawrierow“ Franza Grußa powěda. Nimo toho su schody w nutřkownym sawriera ponowili.