Trjebin (AK/SN). Trjebinska gmejna chce wohnjowoborne awto TSF-W ze stareho Miłoraza předać. To je srjedu wjetšina čłonow gmejnskeje rady wobzamknyła a tak poručenje Slepjanskeho zarjadniskeho zjednoćenstwa sćěhowała. Miłoraz bě jězdźidło w lěće 2005 dóstał.

„Poprawom bě předwidźane, zo awto w zarjadniskim zjednoćenstwje wostanje“, rozłoži nawoda Trjebinskeje wohnjoweje wobory a gmejnski radźićel ­Thomas Husse. Wužiwać chcychu je mjez druhim za wukubłanje kameradow. Tule wariantu faworizowachu wobornicy z Trjebina a Brězowki. Tamne wsy běchu přećiwo tomu, dokelž bychu wudawki ­za to přewulke byli. Tuž so rozsudźichu, wohnjowoborne awto předać.

Miłorasku dobrowólnu wohnjowu wo­boru wutworichu w lěće 1923. Prěnje jězdźidło bě awto typa Garant z připo­wěšakom. Hač do 2005 slědowaše jězdźidło ELO. Po nim wužiwachu TSF-W, kotrež nětko předadźa. Hižo lěta 2001 běchu wohnjowobornu gratownju w Miłorazu přetwarili. Wot 2012 mějachu tam tež předrasćenske rumnosće za žony.