Chróšćanska gmejnska rada lětuši hospodarski plan schwaliła

Chrósćicy (JK/SN). Bě to na wčerawšim posedźenju Chróšćanskeje gmejnskeje rady jenož hišće formalny akt, jako měješe so lětuši hospodarski plan wobzamknyć. Naćisk plana bě nimale cyły měrc na gmejnskim zarjedźe wupołoženy, ale nichtó wo njón njerodźeše. Tak njejsu tež žane znapřećiwjenja dóšli, kotrež bychu k změnam plana wjedli. Tuž móžachu ­radźićeljo plan schwalić. Wjesnjanosta Marko Kliman (CDU) poda do toho ně­kotre dodatne informacije. Tak po dorěčenju z komornicu nowotwar gratownje za wohnjowu woboru do lětušeho plana přenjesechu. Z tym ma gmejna móžnosć, so hižo lětsa wo spěchowanske srědki prócować. Tola tež hdyž tute lětsa při­zwolene dóstanu, chcedźa hakle klětu twarić. Nimo toho chce gmejna wěsće postupować, wočakujo stejišćo Budyskeho krajnoradneho zarjada, kotryž ma lětuši plan pruwować. Jeli so spěchowanje njepřizwoli, by gmejna gratownju z pomocu kredita twarić dyrbjała. Tež za to je stejišćo krajnoradneho zarjada trěbne. Gratownju wšak gmejna hižo dołho planuje.