Krabatowe hry wupředate
Čorny Chołmc. Kartki za lětuše Krabatowe hry w Čornym Chołmcu su wupředate. Tamniši kulturny centrum KRABATowy młyn ptzwr, kiž prěni króć jako zarjadowar wustupuje, přeprošuje na inscenaciju „Na spočatku bě swětło“. Dalša nowostka je, zo budu wopytowarjo na trawersach abo za blidami sedźeć. Za domoródnych su prěni króć wosebity kontingent kartkow rezerwowali.
Šuler kubłanišću hrozył
Budyšin. Hroženja z bombu dla dyrbjachu dźěći Budyskeje spěchowanskeje šule na Alberta Einsteinowej kubłanišćo 24. januara wopušćić. Policija běše je kaž tež wučerjow do Serbskeho šulskeho a zetkawanskeho centruma na Listowej ewakuěrowała. Bombu pak fachowcy namakali njejsu. Kaž so nětko wukopa, je šuler mejlku z hroženjom na šulu pósłał.
Politikarjow lěpje škitać
Planuja skóržbu
Drježdźany. Sakska přetrjebarska centrala planuje zhromadnu skóržbu přećiwo streamingowej platformje Amazon Prime Video. Tuta je mjenujcy připowědźiła, zo chcedźa wot póndźele mjez widejemi wabjenje šaltować. Štóž to nochce, ma měsačnje někak tři euro wjace płaćić. Tute postupowanje je po měnjenju centrale ilegalne.
Wotpokaza zapalerstwo
Wulke Rědorjecy. Poł lěta po tym, zo je so měšćanska cyrkej we Wulkich Rědorjecach wotpaliła, ma so podhladny zapaler wot dźensnišeho před sudnistwom zamołwić. Hnydom na zahajenju procesa w Budyšinje wón wumjetowanja wotpokaza. Wón drje bě na městnje, ale jako wěriwy muž, njeby nihdy na nihdy cyrkej zapalił, wón wuzběhny.
Jězdźenki bórze dróše?
Lammerta znowa přeprosyli
Budyšin. Bywši prezident zwjazkoweho sejma Norbert Lammert chce na 30. politisku popjelnu srjedu sakskeje CDU w Budyšinje rěčeć. Tole wuchadźa z přeprošenja na zarjadowanje 14. februara. CDU sej kóžde lěto prominentnych hosći na politisku popjelnu srjedu přeprosy, Lammert bě hižo w lěće 2009 z hosćom.
Zwjazk dalekubłanja załoženy
Budyšin. Zastupjerjo chorownjow a wukubłacych domjacych lěkarkow kaž tež domjacy lěkarjo Budyskeho wokrjesa su dalekubłanski zwjazk „Domjacy lěkarjo za wokrjes Budyšin“ załožili. Zaměr zwjazka je mj. dr. dorost při dalekubłanju na powšitkowneho medicinarja podpěrać. Tak ma so přiběracym wobmjezowanjam mediciniskeho zastaranja zadźěwać.
Honjaki F-35 do Čěskeje
Busowi šoferojo stawkuja
Budyšin. Na připowědźenym busowym stawku dźěłarnistwa Ver.di chcedźa so jutře tež přistajeni předewzaćow Regionalny bus Hornja Łužica tzwr a wobchadna towaršnosć Wojerecy zwr wobdźělić. Tuž dóńdźe w Budyskim wokrjesu k wobmjezowanjam přez wupad jězbow. Dokładny přehlad wo jězbach, kotrež wupadnu, nańdu zajimcy na internetnej stronje www.regionalbus-oberlausitz.de.
Změjemy dualne wysoke šule
Drježdźany. Sakski krajny sejm je wčera wječor zakoń wo dalewuwiću powołanskeje akademije Sakskeje na dualnu wysoku šulu Sakska (DHSN) schwalił. Z tym ma akademija hač do kónca lěta wuměnjenja za wuspěšny start dualneje wysokeje šule Sakskeje wot 1. meje 2025 wutworić. Wědomostne ministerstwo ju při tym partnersce přewodźa.
Direktor wuwjazany
Pytaja nowe ideje za staru šulu
Wojerecy. „Šula při planetariju“ we Wojerecach ma so na městno wutworić, kotrež inowaciju, kubłanje a zhromadnosć spěchuje. K zdobywanju idejow přewjedźe projekt „NewCityConcepts“ interaktiwnu planowansku dźěłarničku. Jeje hłowny zaměr je, ideje za dalewužiwanje areala a twarjenjow namakać, konkretizować a wizualizować.
Po zwadźe baru zapalił
Liberec. Wopytowar je wčera w nocy w Liberecu po zwadźe z posłužowarku baru zapalił. To zdźěli čěska nowina MF Dnes. 15 ludźi so zrani, sydom z nich ćežko. Jich dowjezechu wuchowanske jednotki z helikopterom do bliskich chorownjow. Skućićel ćekny. Kriminalna policija za nim podhlada wohrožowanja zjawnosće dla slědźi a prosy swědkow wo dalše pokiwy.
Protyku wojakow spalili
Kompetency přepruwuja
Drježdźany. Na zakładźe wuslědkow kubłanskich přepytowanjow přewjedu so lětsa 28. a 29. meje přepytowanja kompetencow šulerjow 2. lětnika na wšitkich zjawnych zakładnych a spěchowanskich šulach w Sakskej. W předmjetomaj němčinje a matematice chcedźa tak rozdźěle w dale a heterogenišim šulerstwje zwěsćić.
Rjemjesło nadal woblubowane
Drježdźany. Zajim za rjemjeslniske wukubłanje bě tež loni w Sakskej wulki. Kaž zdźěli rjemjeslniski zwjazk Sakskeje póndźelu, podpisa 2023 5558 wučomnikow swoje wukubłanske zrěčenje. Tole běchu jeno dźewjeć mjenje hač hišće 2022. Přirunujo z předlońšim běchu wosebje městna jako muler a rybar prašane.
Městnosće UNESCO we Łužicy
Mužakow. Na dźensnišim wuradźowanju zastupjerjow městnosćow UNESCO we Łužicy wo lětušich projektach wobdźělitaj so tež referentaj Domowiny Clemens Škoda a Pětr Brězan. Do zwjazka „UNESCO5“ słušeja nimo Błótow, hornjołužiskeje hole a hatow, Mužakowskeho parka a zahorka tež nałožki serbskeho ludu. Tema dźensa budźe mjez druhim lěpša zhromadna prezentacija w přichodźe.
Serbski wosadny zwjazk so zešoł
Hodźij. Na hłownej zhromadźiznje Serbskeho wosadneho zwjazka předwčerawšim w Hodźiju wuradźowachu zastupjerjo a zastupjerki dwurěčnych ewangelskich wosadow cyrkwinskeho wobwoda Budyšin-Kamjenc wo swojim dźěle. Serbski superintendent Krystof Rummel poda přehlad wo wobšěrnych aktiwitach. Lětsa wočakuje Serbski wosadny zwjazk wopyt biskopa Tobiasa Bilza a organizuje nahrawanje serbskich kěrlušow.
Richter na zwjazkowej lisćinje
Berlin. Kubšiski pjekarski mišter a načolny kandidat FDP Sakskeje Stefan Richter nastupi na městnje 14 zwjazkoweje lisćiny liberalnych za wólby Europskeho parlamenta. Rjemjeslnik je na nominowanskim zjězdźe wčera w Berlinje w dźěłowej drasće wustupił. Swoju kandidaturu mjenowaše „wosebitosć a runje tak samozrozumliwosć“. Delegaća wuzwolichu 44lětneho z 90 procentami hłosow.
Edding inwestuje w Budyšinje
Skóržbu zapodali
Wulke Rědorjecy. Zhorjelske statne rěčnistwo je na Budyskim krajnym sudnistwje skóržbu přećiwo 41lětnemu skućićelej zapodało, policija wčera wozjewi. Rěčnistwo jemu wumjetuje, zo je wón cyrkej we Wulkich Rědorjecach zapalił. Sudniski proces zahaji so 5. februara w Budyšinje. Mjeztym dźěłaja fachowcy na nuzowej třěše, kotraž ma wotpalenu cyrkej škitać.
Angažement kóždeho trěbny
Drježdźany. Składnostnje wopomnjenskeho dnja za wopory nacionalsocializma jutře, je sakska ministerka za kulturu a předsydka załožboweje rady Załožby Sakske wopomnišća Barbara Klepsch (CDU) wuzběhnyła, zo trjebamy bóle hač hdy prjedy angažement kóždeho jednotliwca. „Demokratiju, swobodu měnjenja, tolerancu dyrbimy zakitować. Tole smy woporam nacionalsocializma winowaći.“
Inspiracija z Łužicy
Budyšin na pjatym městnje
Drježdźany. Sakska je po wuslědkach naprašowanja portala Booking.com na druhim městnje lisćiny najhospodliwišich zwjazkowych krajow. A tež mjez najpřijomnišimi městami w Němskej, smě so Sakska wjeselić: Na pjatym městnje tuteje lisćiny steji město Budyšin. Zamołwići z politiki a hospodarstwa su z tutym wuslědkom jara spokojom.
Nowa serbska sobudźěłaćerka
Praha. Josefina Ofnerowa, nawodnica běrowa Sakskeho zastupnistwa w Praze, je wčera něhdźe 100 hosći na nowolětne přijeće witała, mjez nimi tež jednaćelku Domowiny Judit Šołćinu. Po wotewrjenju wustajeńcy sakskeho tekstilneho wuměłstwa je Ofnerowa hosćom tež nowu koleginu, Serbowku Katrin Nowakowu předstajiła. Wona pochadźa z Mosta w Delnjej Łužicy.
Swjeći swoje stoćiny
Elke Erb njeboha
Berlin. Wuznamna spisowaćelka Elke Erb je njeboha. 85lětna zemrě minjenu póndźelu w Berlinje. Lawreatka mjez druhim Georga Büchneroweho myta a čłonka Sakskeje akademije wědomosćow je tež we wysokej starobje přewšo produktiwnje lyriku a prozu tworiła kaž tež rusku poeziju přebasniła, za čož w lěću prawidłownje we Wuježku přebywaše.
Přihotuja wulku demonstraciju
Budyšin. Na Budyskim Hłownym torhošću wotměwa so tutu sobotu, 27. januara, w 14 hodź. demonstracija. Pod hesłom „Zhromadnje za čłowjeskosć, demokratiju a našu swobodu w Budyšinje. Nětko!“ namołwja zwjazk mnohich iniciatiwow w němskej a serbskej rěči za wobdźělenje. Rěčeć ma mj. dr. sakski statny ministra za nutřkowne Armin Schuster (CDU).
Swětło jako spominanje