Łužiske lodohokejowe liški –

EHC Freiburg 3:2 (0:0, 2:0, 1:2)

Łužiske lodohokejowe liški běchu pjatk wječor wot spočatka postajowace mustwo. Přewažnje běše hóstne mustwo z tym zaběrane, žane zažne přećiwne wrota kasěrować, štož so jim tež poradźi. Wot 5. min., po wulkej šansy hosći, wuwi so potom trochu wurunaniša partija, tež hdyž sej liški cyłkownje wjac třělwow na wrota nadźěłachu. Tola wrotarjow njemóžachu w prěnjej třećinje hišće přewinyć.

Tole pak sta so potom w srjedźnym wotrězku, znajmjeńša na jednym boku. Liška Charlie Jahnke trjechi mjenujcy hnydom dwójce. Najprjedy měješe wón wuspěch w hač dotal jeničkej hrě z jednym hrajerjom wjac na lodźe z distancnej třělwu. Wrotar Fabian Hegmann njeměješe wjele wobchada před swojimi wrotami dla dosć wida (29.). A krótko do kónca třećiny zwyši wón samo na 2:0 (39.). W běhu cyłeho srjedźneho wotrězka mějachu sej wjelki ćežko, strašne akcenty w ofensiwje sadźeć. Domjacy agěrowachu přewšo agresiwnje a kompaktnje.