Krótkopowěsće (28.04.16)
Nalětnje wožiwjenje zwěsćili
Budyšin. We wuchodnej Sakskej bě w aprylu 25 307 bjezdźěłnych, 2 237 mjenje hač w měrcu. Spad zwěsća Budyska agentura za dźěło we wšěch powołanskich a starobnych skupinach. Kwota bjezdźěłnosće je 8,7 procentow. Sezonalne přistajenske efekty su hižo wšudźe pytnyć, byrnjež přeće za nalětnimi temperaturami spjelnjene njebyło.
Delegowanje přizwolił
Wojerecy. Přichodne posedźenje Zwjazkoweho předsydstwa Domowiny budźe 28. meje w Budyšinje a nic w Slepom. To je jeho prezidij wčera we Wojerecach wobzamknył. Přizwolił je próstwam wo delegowanje rejwanskeje skupiny Smjerdźaca w juliju do Awstriskeje a w oktobru do Indiskeje kaž tež kulturnej wuměnje chóra Meja z chórom z Baški na Morawje.
Sněh chaos zawinił
Celovec. Njewšědny sylny sněh je na juhu Awstriskeje wulke škody a wobchadny chaos zawinił. Něhdźe 9 000 domjacnosćow bě dźensa hišće bjez miliny. Čerwjeny křiž dyrbješe sta šoferow zastarać, kotřiž běchu na awtodróhach w Korutanskej tčacy wostali. Wčera bě so w horach hač do 80 centimetrow sněha našło. Wjacore milinowody so roztorhachu.
Krótkopowěsće (27.04.16)
Prěni stražni policisća
Drježdźany. Prěni stražni policisća w Sakskej su dźensa słužbu nastupili. Nutřkowny minister Markus Ulbig (CDU) přepoda 47 absolwentam po třoch měsacach wukubłanja wopisma. Woni maja saksku policiju podpěrać. Stražni policisća su drje wobrónjeni, maja pak mjenje kompetencow hač policija. Jich słužba je na dwě lěće wobmjezowana.
Atomowe koncerny maja płaćić
Berlin. Štyri atomowe koncerny Němskeje maja po woli knježerstwoweje komisije zhromadnje 23,34 miliardow eurow za kóšty składowanja jadrowych wotpadkow znosyć. Po tym puću ma so zakónčenje atomoweje miliny financować, kaž powěsćernja dpa piše. Wot knježerstwa powołana komisija hižo wjacore měsacy z koncernami jedna.
Próstwu wo titul přestorča
Praha/Drježdźany. Čěska republika a Sakska stej so dojednałoj, zo zhromadnu próstwu wo přiwzaće Rudnych horin do zapisa swětoweho kulturneho namrěwstwa UNESCO cofnjetej. Zamołwići UNESCO běchu poručili, podłožki dale wudospołnić. Předźěłana próstwa ma hač do 1. februara 2017 předležeć. Za dwě lěće chce UNESCO potom rozsudźić.
Krótkopowěsće (26.04.16)
Peticija přizwolena
Wětošow/Brüssel. Peticiski wuběrk Europskeho parlamenta přizwoli wčera peticiji Łužiskeje aliancy, zakónčić wudobywanje brunicy we Łužicy. Nětko maja so Europska komisija a dalše fachowe wuběrki z prašenjemi peticije rozestajeć. Jeje zaměr je, žane dalše brunicowe jamy njedowolić kaž tež dalšemu zanjerodźenju wobswěta zadźěwać.
Tilich Korejčanow pohonjał
Seoul. Prezident Zwjazkoweje rady, sakski premier Stanisław Tilich (CDU), je Korejčanow na swojim wopyće w Seoulu pohonjał, njespušćić nadźiju na znowazjednoćenje kraja. „Druhdy nastawaja zbožowne wokomiki w stawiznach spěšnišo, hač sej mysliš“, Tilich rjekny. Wón je hišće hač do kónca tydźenja z hospodarskej delegaciju w dźělenej Koreji.
Staciju počesća z mytom
Krótkopowěsće (25.04.16)
Předmjet WTH šmórnyć
Drježdźany. Sakska statna ministerka za kultus Brunhild Kurth (CDU) chce w nowym šulskim lěće w 10. lětniku srjedźnych a wyšich šulow předmjet hospodarstwo, technika a domjacnosć (WTH) šmórnyć. Tole zdźěli kubłanskopolitiska rěčnica frakcije Lěwicy w krajnym sejmje Cornelia Falken. Tak móhli tydźensce tři wučbne hodźiny zalutować.
Wumjetuje EU njezrozumjenje
Waršawa. Pólski prezident Andrzej Duda je Europskej uniji wumjetował, zo nima zrozumjenje za problemy swojich wuchodoeuropskich čłonskich statow w zwisku z ćěkancami. W rozmołwje z pólskej powěsćernju PAP žadaše sej Duda wčera „wjace solidarity“. Dokelž Pólska lědma ćěkancow přiwozmje, jej w Brüsselu pobrachowacu solidaritu wumjetuja.
Zhromadnje přećiwo crystalej
Krótkopowěsće (22.04.16)
Wokrjes ma daty wozjewić
Drježdźany/Choćebuz. Zhorjelski wokrjes ma wobswětowe daty přirodoškitneje kónčiny wozjewić, kotraž bu wot Wochožanskeje brunicoweje jamy zničena. Tole rozsudźi dźensa Drježdźanske zarjadniske sudnistwo. Skoržiła bě Choćebuska wobswětowa skupina. Vattenfall je wjele lět tomu zadźěwać spytał. Po wšěm zdaću prócuje so šwedske předewzaće zatajeć, kelko škody je wotbagrowanje brunicy načiniło.
Gauck do Zhorjelca a Žitawy
Zhorjelc/Žitawa. Zwjazkowy prezident Joachim Gauck chce přichodny štwórtk, 28. apryla, do Zhorjelca a Žitawy přijěć, zo by so wo němsko-čěsko-pólskim zhromadnym dźěle informował. Wón so tón dźeń z komunalnymi politikarjemi, čestnohamstce skutkowacymi a młodźinskimi kulturnymi towarstwami zetka. Tole zdźěli Zwjazkowy prezidialny zarjad.
Schlaraffia tola přežiwi?
Krótkopowěsće (21.04.16)
Koncepciji přihłosowali
Berlin. Rada Załožby za serbski lud je na swojim wurjadnym posedźenju dźensa w Berlinje koncept polěpšeneho nałožowanja serbskeje rěče w nowych medijach za lěta 2016 do 2018 schwaliła. Na tymle zakładźe su nětko tež w zwjazkowym etaće předwidźane srědki we wysokosći 765 000 eurow přizwolene, rjekny předsyda załožboweje rady Jan Budar.
Rezolucija schwalena
Freiberg. Sakscy kulturnicy a politikarjo SPD, Zwjazka 90/Zelenych a Lěwicy su na zetkanju njedawno w Freibergu rezoluciju nastupajo zakoń kulturneho ruma schwalili. Woni žadaja sej sprawne mzdy za na kulturnym polu skutkowacych, woprawdźitu ewaluaciju zakonja ze zaměrom, zo móhli so kulturne rumy načasnje wuwiwać, a dynamizaciju přiražkow.
Podpěru EU sej žadali
Krótkopowěsće (20.04.16)
Swětowe mišterstwa w Drjowku
Drjowk. Swětowe mišterstwa dwukonjacych zapřahow wotměwaja so lěta 2019 w Drjowku pola Choćebuza. Tole zdźěli dźensa mjezynarodna třěšna organizacija konjaceho sporta Fédération Équestre Internationale. Berlinsko-braniborski zwjazk konjaceho sporta je zamołwitym w Drjowku mjeztym k tutomu „njewšědnemu zbožu“ gratulował.
W juliju wjace renty
Berlin. Něhdźe 20 milionow rentnarjow dóstanje w lěću čujomnje wjace pjenjez. W zapadnej Němskej maja so renty 1. julija wo 4,25 procentow zwyšić, we wuchodnych krajach wo 5,95 procentow. Tole je zwjazkowe knježerstwo dźensa rozsudźiło. Rozrost je wuslědk dobreho połoženja na dźěłowych wikach a z tym zwjazanych wyšich dochodow ludźi.
Myto LEX wuwołane
Choćebuz. Hižo 13. raz je łužiska hospodarska iniciatiwa (WiL) k wubědźowanju wo myto załožerjow swójskeje eksistency namołwjało. Wo nje móža so ludźo, kotřiž su w zašłych štyrjoch lětach swójske předewzaće załožili, hišće hač do kónca awgusta požadać. Nimo pjenježnych mytow profituja zajimcy tež z najwšelakorišich zarjadowanjow WiL.
Krótkopowěsće (19.04.16)
Bamž: Ćěkancy su nam dar
Rom. Bamž Franciskus je ludźi po wšěm swěće namołwjał, so z dóńtom ćěkancow njewotnamakać, ale jich jako wobohaćenje wobhladować. „Přečasto maja was ludźo za přidatnu ćežu. Nawopak! Wy sće nam dar“ rjekny bamž dźensa w Romje składnostnje 35lětneho wobstaća jezuitskeho doma ćěkancow.
Nowy abiturny předmjet
Schwerin. Mecklenburgsko-předpomorski minister za kubłanje, Mathias Brodkorb (SPD) chce, zo stanje so nižoněmčina z předmjetom za maturu. Wot 7. lětnika móhli sej šulerjo nižoněmčinu jako druhu cuzu rěč přiswojić a na wu-zwolenych gymnazijach hač do matury wuknyć. Za to chce Brodkorb wotpowědne wučbnicy wuwiwać dać.
Pišćele za Praski hród
Praha. Pišćele w katedrali swjateho Víta na Praskim hrodźe njejsu kmane, cyły rum łódźe ze zynkom wupjelnić. Wotpomhać měł natwar noweho mócnišeho instrumenta z 10 000 pišćelowymi pišćałkami. Trěbnych 2,6 mio. eurow chcyło Praske arcybiskopstwo tež z pomocu zběrki zhromadźić. Idealnje móhli nowe pišćele k 100. róčnicy załoženja Čěskosłowakskeje w lěće 2018 hotowe być.
Sezonu z wuspěchom zakónčili
Krótkopowěsće (18.04.16)
Serb na diakona wuswjećeny
Drježdźany. Emeritowany biskop Joachim Reinelt je sobotu w Drježdźanskej katedrali Floriana Mróza a Thomasa Wiesnera na diakonow wuswjećił. 26lětny Mróz pochadźa z Kulowca, je w Erfurće studował a wukonješe swój pastoralny praktikum zašłe měsacy w Budyskej tachantskej wosadźe. Klětu swjatki ma Serb měšnisku swjećiznu přijimać.
Na šulerskej wuměnje w Čěskej
Mělnik/Ralbicy. Wot dźensnišeho přebywaja šulerjo 5. lětnika Ralbičanskeje wyšeje šule w Mělniku. Srjedu nawróća so z tamnišimi šulerjemi do Ralbic, hdźež wječor zhromadnje w šuli swjeća. Štwórtk dojědu sej wšitcy na kulturnu kupu Einsiedel a pjatk budźe zabawne dopołdnjo na šuli. Lětušu wuměnu zakónča z wulětom do Małeho Wjelkowa.
Serbske popołdnjo wuspěšne
Krótkopowěsće (15.04.16)
Próstwa Turkowskeje přizwolena
Berlin. Chłostanske jednanje přećiwo satěrikarjej Janej Böhmermannej ranjenja turkowskeho prezidenta Recep Tayyipa Erdoğana dla je móžne. Zwjazkowe knježerstwo je dźensa próstwje Turkowskeje wotpowědowało. Tole zdźěli zwjazkowa kanclerka Angela Merkel (CDU) nowinarjam w Berlinje.
Wjace wobchadnych njezbožow
Zhorjelc. Ličba wobchadnych njezbožow je w Budyskim a Zhorjelskim wokrjesu loni prěni króć po třoch lětach zaso přiwzała. Tole wuchadźa z wozjewjeneje bilancy Zhorjelskeje policajskeje direkcije. Cyłkownje běchu 15 799 zražkow zličili (2014: 15 598). Při tym so 35 ludźi smjertnje zrani, pjećo wjace hač 2014. Hłowne přičiny běchu smalenje, njedosahacy wotstawk a alkohol.
Wotstawk dźeń a wjetši
Berlin. Aktualna roprawa UNICEF pokazuje, zo bywa wotstawk mjez chudymi a bohatymi dźěćimi w industrijnych krajach dźeń a wjetši. Najlěpje wotrěznje w mjezynarodnym přirunowanju mjez 41 krajemi Europskeje unije a OECD Danska. Němska zarjaduje so na 14. městnje. Přepytowali běchu wobłuki, zasłužbu, strowotu abo spokojnosć ze žiwjenjom.
