Krótkopowěsće (17.12.15)
Hodowny staršiski list wušoł
Budyšin. Najnowši staršiski list Serbskeho šulskeho towarstwa wěnuje so temje „strowota-chorosć“. Dr. med. Jana Markowa podawa staršim pokiwy k hladanju choreho dźěsća, kaž ze zdźělenki towarstwa wuchadźa. Składnostnje 25lětneho wobstaća SŠT wěnuje so předsydka Ludmila Budarjowa modelowemu projektej Witaj a koncepciji 2plus.
Skruća styki do Ruskeje
Drježdźany. Sakska chce swoje styki do Ruskeje najebać wobstejace sankcije dale skrućić. Tole je hospodarski minister Martin Dulig (SPD) dźensa w krajnym sejmje připowědźił. Zdobom wón wumjetowanja wotpokaza, zo so swobodny stat přemało wo normalizowanje poćahow k Ruskej stara. Dulig připowědźi wjace stykow na politiskej runinje.
Na njedobro dieselowych awtow
Krótkopowěsće (16.12.15)
Koncept za SKI předleži
Budyšin. Załožba za serbski lud je w swojim nadawku nastaty koncept Bosćija Benady wo zaměstnjenju Serbskeje kulturneje informacije (SKI) nětko na swojej internetnej stronje wozjewiła. Wjace hač 100 stron wopřijacy posudk přirunuje lěpšiny a njedostatki nětčišeho stejnišća w Serbskim domje z móžnym w Röhrscheidtowej bašće. Załožbowa rada ma klětu w aprylu wo tym rozsudźić.
Serbiska so spřećiwja
Běłohród. Serbiska spřećiwja so bytostnemu dypkej posrědkowanja Europskeje unije z Kosowom. Njebudźe žaneje milinoweje towaršnosće po zakonjach Kosowa k zastaranju serbiskeje mjeńšiny, kaž sej to Brüssel žada, rjekny dźensa direktor statneho milinoweho předewzaća Nikola Petrović. Tajka towaršnosć njewotpowěduje serbiskej wustawje.
Naćisk zakonja schwalili
Krótkopowěsće (15.12.15)
Prědowarja zajeli
Karlsruhe. Zwjazkowe statne rěčnistwo je radikalneho islamista Svena Lauwa dźensa rano we wulkorumje Düsseldorf zajeć dało. Wumjetuje 35lětnemu prědowarjej, zo je lěta 2013 z Němskeje wuchadźejo jako podlěšena ruka w Syriskej aktiwneje teroristiskeje organizacije Jamwa skutkował. Lau je w štyrjoch padach podhladny podpěry wukrajneho teroristiskeho zwjazka dla.
Přećiwo próstwje hłosować
Budyšin. Budyski wokrjesny sejmik je přirjadnicu Birgit Weber społnomócnił, wuprajić so na posedźenju kulturneho konwenta 17. decembra přećiwo próstwje města Zhorjelc wo čłonstwje z prawom wothłosowanja w kulturnym rumje Hornja Łužica-Delnja Šleska. Financneje lěpšiny z toho njebudźe, runa ličba čłonow pak rozsudam njepolěkuje.
Kralestwo njedaloko Łužicy
Krótkopowěsće (14.12.15)
10 000 zapiskow
Budyšin. Biografiski nastawk wo serbskim žurnalisće a spisowaćelu Jurju Wićazu je 10 000. zapisk w hornjoserbskej wersiji encyklopedije Wikipedia. Serbska wikipedija wobsteji wot oktobra 2006. Po ličbje artiklow steji wona na 128. městnje z tuchwilu 289 rěčnych wersijow. Zaměr projekta Wikipedia je, encyklopediju we wšěch rěčach swěta natwarjeć.
Kompaktny přehlad datow
Drježdźany. Prezident Statistiskeho krajneho zarjada Sakskeje Burkhard Müller je dźensa předstajił statistisku knihu 2015. Wona podawa přehlad wo wažnych datach a faktach ze wšěch žiwjenskich wobłukow Saksow w kompaktnej formje. Mjez druhim tam steji, zo je lěta 2014 w Sakskej 35 935 dźěći na swět přišło, najwjetša to ličba wot 1990.
Železniski zwisk wožiwjeny
Aš/Selb. Wot wčerawšeho wobsteji po 70 lětach wobnowjeny wosobowy železniski zwisk mjez najzapadnišim čěskim městom Aš a bayerskim Selbom. Tale čara bu 1951 w zwisku z wuspěšnym přejězdom cyłeho ćaha na zapad dla znaty. Po wobšěrnej rekonstrukciji wosom kilometrow dołheje trasy měło tule wšědnje dźewjeć porow ćahow jězdźić.
Krótkopowěsće (11.12.15)
Přistaja dalšich wučerjow
Drježdźany. K zahajenju druheho šulskeho połlěta klětu w februaru přistaji Swobodny stat Sakska 760 nowych wučerjow. Přistajenja su po wuprajenju ministerstwa trěbne, zo móhli na generacisku změnu reagować. Nimo toho ličba šulerjow dźeń a bóle přiběra. Nimale 400 sakskich wučerjow poda so přichodne měsacy staroby dla na wuměnk.
Ćah zaso direktnje do Wrócławja
Drježdźany/Wrócław. Ze změnu jězbneho plana Němskeje železnicy maja wot njedźele, 13. decembra, zaso tři ćahi bliskowobchada z Drježdźan direktnje do Wrócławja a wróćo jězdźić. Jězbny čas z Budyšina je połtřeća do třoch hodźin. Zaměr měł mjezynarodny dalnozwisk na mjenowanej čarje wostać, zwuraznichu Zeleni w Sakskim krajnym sejmje.
Ležownosće so podróšeja
Krótkopowěsće (10.12.15)
Bilanca biskopstwa
Drježdźany. Drježdźansko-Mišnjanske biskopstwo je wčera lońšu hospodarsku rozprawu předpołožiło. Bilanca jasnje pokazuje, zo je tale dieceza pokazana na pomoc zapadoněmskich diecezow. Ze 74,2 milionow eurow dochodow pochadźa 17,8 milionow ze zapada. Wudało je biskopstwo 71,1 milion eurow, mjez druhim 31,2 milionaj za personal.
Kliniku zjawnje wupisaja
Lubij. Wot měrca hižo njewužiwana něhdyša Lubijska rehabilitaciska klinika budźe zjawnje wupisana, kaž krajny rada Bernd Lange (CDU) připowědźi. Zajimca za to hižo maja, byrnjež lochko njebyło kliniku předać. Lange zdobom wobkrući, zo njebudu tam ćěkancy zaměstnjeni. Po tym zo bě rehaklinika wot lěta 2013 čerwjene ličby pisała, tam wot lońšeho žane kury wjac njeposkićeja.
Z powjaznicu jězdźić so podróši
Liberec. Jězba z powjaznicu na 1012 metrow wysoki Ještěd pola Libereca budźe wot 13. decembra dróša. Jednora jězdźenka podróši so wot 75 na 99 krónow, nawrótna wot 120 na 140 krónow. Podróšenje potrjechi tež wobsedźerjow euronysoweho tiketa. Za nich bě jězba dotal darmotna, nětko płaća 35 krónow za obligatorisku měšćenku.
Krótkopowěsće (09.12.15)
Jednotne wupokazy ćěkancam
Berlin. Zwjazkowe knježerstwo je wobzamknyło, ćěkancam po wšej Němskej jednotne wupokazy dać. Tole by lěpšej wuměnje datow mjez zarjadami zaručiło, kaž z Berlina rěkaše. Wotpowědny naćisk zwjazkowy kabinet dźensa schwali. Hłowny zaměr je, pospěšić registraciju požadarjow azyla. Wupokazy maja klětu w lěću po cyłym Zwjazku płaćić.
Mikławšk pěstowarnje wopytał
Worklecy/Smjerdźaca. Zapósłanc CDU w Sakskim krajnym sejmje Alojs Mikławšk je dźensa we wobłuku swojich tradicionalnych dohodownych wopytow pěstowarnjow we Worklecach a Smjerdźacej pobył. Jako překwapjenku měješe wón adwentne swěčki sobu, kotrež móža dźěći samostatnje wudebić, kaž ze dźělenki wuchadźa.
Pokładnja so spěšnje pjelni
Drježdźany. Znowa dobra to powěsć za sakskeho financneho ministra Georga Unlanda (CDU): Swobodny stat změje kónc lěta z 12,76 miliardami eurow prawdźepodobnje wjace dochodow z dawkow hač wočakowane. Prognoza dawkow z lětušeje meje budźe tak wo 320 milionow eurow wyša, zdźěli Unland w Drježdźanach.
VfL Wolfsburg we wosmifinalu
Krótkopowěsće (08.12.15)
Knježerstwo zrěčenje schwaliło
Drježdźany. Sakske statne knježerstwo je mjeztym 3. zrěčenje wo financowanju Załožby za serbski lud schwaliło. Wone płaći za lěta 2016 do 2025 a ma cyłkowny pjenježny wobjim 18,6 milionow eurow wob lěto. Wo tym informowaše ministerka za wědomosć a wuměłstwo dr. Eva-Maria Stange (SPD) nowinarjow dźensa w Drježdźanach.
Klětu kiwa zaso myto
Drježdźany. Rjemjeslniska komora Drježdźany chce klětu pjaty raz wuchodosakske rjemjeslniske zawody wuznamjenić, wopokazuja-li so hladajo na demografiske wuwiće regiona jako do přichoda nastajene. Wšitke zawody, kotrež hižo dlěje hač dwě lěće dźěłaja, móža so wo Myto přichoda w hódnoće 3 000 eurow požadać.
Husace wiki přeprošeja
Rakecy. Husace wiki w Rakecach su wot zahajenja 1. nowembra stajnje derje wopytane. Wulki poskitk słódnych jědźow z husaceho a dalšeho pjeriznoweho mjasa wabi wopytowarjow. Wosebita chłóšćenka su lětsa pražene kołbaski z husaceho mjasa. Rakečanske wiki w zawodźe Eskildsen su wšědnje wot 10 do 19 hodź. wotewrjene a traja hišće hač do 22. decembra.
Turněraj volleyballa přewjedli
Krótkopowěsće (07.12.15)
50 lět Lessingowe dny w katalogu
Kamjenc. Z wjace hač 300 fotami podawa nowa publikacija Kamjenskeho Lessingoweho muzeja přehlad wo stawiznach 50 Lessingowych dnjow wot lěta 1962. Je to zdobom katalog wosebiteje wustajeńcy składnostnje jubileja. Dalši katalog přeproša pod hesłom „Luther – Gellert – Lessing. Fabel in Reformation und Aufklärung“ na jězbu po stawiznach fabule w Němskej.
Wopismo wo rekordźe dóstali
Budyšin. Institut rekordow za Němsku je wčera kralej Wjacławej IV. alias Michaelej Heuselerej wopismo „Najstarše w chronice mjenowane hodowne wiki“ w němskej a serbskej rěči přepodał. Stawizny Budyskich adwentnych wikow sahaja hač do lěta 1348. Tehdy bě Kral Wjacław IV. (1361–1419) městu Budyšinej dowolił mjasowe wiki zarjadować.
Rěče mjeńšin lěpje škitać
Krótkopowěsće (04.12.15)
W lisće prosy wo pomoc
Pančicy-Kukow. Wosobinski list je wjesnjanosta gmejny Pančicy-Kukow Markus Kreuz (CDU) wčera wšitkim domjacnosćam swojeje komuny připósłał. W nim rozłožuje wón tuchwilnu napjatu situaciju wokoło ćěkancow a skedźbnja na winowatosć komunow, spytać problemy sobu rozrisać. Kreuz wobydlerjow napomina, zo měli gmejnje zdźělić, maja-li móžne swobodne bydlenja a kmane płoniny.
Nowe čisło „Naša Domowina“
Budyšin. Nowe čisło informaciskeho łopjena „Naša Domowina“ informuje mjez druhim wo rozsudźe Lubina a Kalawy, kotrejž prosytej wo přistup k serbskemu sydlenskemu rumej, a wo wobzamknjenjach zašłeho posedźenja Zwjazkoweho předsydstwa Domowiny. Předstajeni su mjez druhim tež lawreaća lětušeho Myta a Čestneho znamješka Domowiny.
Piwarnja dźěłać započała
