168 inficěrowanych we wokrjesu
Budyšin. Přez kónc tydźenja je ličba z koronawirusom natyknjenych w Budyskim wokrjesu wo 45 na 168 přiběrała. Wjetšina z nich su přiwuzni hižo inficěrowanych. W karantenje je tuchwilu 741 ludźi. Dalši schorjeny je zaso strowy, tak zo mamy mjeztym cyłkownje dwanaće wustrowjenych we wokrjesu. Třo pacienća su aktualnje w chorowni.
Łužiski přinošk ze šansu na myto
Drježdźany. Hačrunjež za 4. a 5. junij planowane Němsko-Pólske medijowe dny wupadnu, ma so 23. wubědźowanje wo žurnalistiske myto Tadeusza Mazowieckeho přewjesć. Mjez cyłkownje 29 zapodatymi namjetami ma tež přinošk Romana Nuka „Na dobre susodstwo – Kak dale po 15 lětach rozšěrjenja EU“ šansu na wuznamjenjenje.
Tež w Błótach turizm ćerpi
Podstupim. Aktualna strowotniska situacija so tež na turizm we Łužicy wuskutkuje. Po informacijach Němskeho zwjazka hotelow a hosćencow woznamjenja 800 000 pobrachowacych přenocowanjow jeničce w aprylu deficit cyłkownje něhdźe 50 milionow eurow. Błótowski turistiski zwjazk w tym zwisku wuzběhnje, zo je tuchwilu něhdźe 300 čołmarjow w Lubinje bjez dochodow.
123 inficěrowanych we wokrjesu
Budyšin/Zhorjelc. Ličba wobkrućenych, z koronawirusom inficěrowanych we wokrjesu Budyšin je wo jědnaće na cyłkownje 123 wosobow přiběrała. Dohromady je tuchwilu 914 ludźi w karantenje. Strowotniski zarjad na to skedźbnja, zo su natyknjenja po cyłym wokrjesu a wšitke starobne skupiny potrjechene. W Zhorjelskim wokrjesu zwěsćichu cyłkownje 53 infekcijow, tam je dotal jedna wosoba zemrěła.
Online-poskitk Płomjenja
Budyšin. Wot wčerawšeho poskića Płomjo online-seriju „Krimije přećiwo wostudźe“. Krótke słuchohry redaktor Pětr Šołta doma ze swojimi dźěćimi nahrawa. „Njeńdźe wo profesionelnosć, ale wo to, na serbske teksty słuchać, je zrozumić a krimi prawje wuhódać. Za to kiwaja mjenujcy rjane myta.“ Pytajće na Youtube pod hesłom PŁOMJO.
6,7 milionow eurow za šule
Budyšin. Sakska natwarna banka je Budyskemu wokrjesej dohromady 6,7 milionow eurow za digitalizaciju w šulach přilubiła. Pjenjezy maja so hač do lěta 2024 za „lěpšu digitalnu infrastrukturu na cyłkownje 30 šulach w nošerstwje wokrjesa“ nałožić, w zdźělence krajnoradneho zarjada rěka.
112 inficěrowanych we wokrjesu
Budyšin. Z jědnaće wosobami wjace hač dźeń do toho je ličba z coronawirusom natyknjenych w Budyskim wokrjesu na 112 stupała. Ličba postajenych karantenow je na 1 090 rozrostła. Faktisce je nětko 845 wosobow w karantenje, dokelž su znowa wjacore zakónčene. Dalša natyknjena wosoba je so wustrowiła, dohromady je jich mjeztym wosom. Jedyn pacient bě minjeny tydźeń zemrěł.
Festiwal filma so njewotměje
Wulke Hendrichecy. Filmowy festiwal Nysa (NFF) so w meji njewotměje. „Organizacija programa z wjace hač 20 hrajnišćemi w třoch krajach je hižo bjez aktualnych wobmjezowanjow wulke wužadanje. Tuchwilna situacija žane spušćomne přihoty njedowola“, zdźěla festiwal organizowace towarstwo Kunstbauerkino. Hač 17. NFF dospołnje wupadnje, tuchwilu hišće jasne njeje.
Sezonu železnicy pozdźišo zahaja
Mužakow. Zahajenje sezony Mužakowskeje lěsneje železnicy je najprjedy raz na 1. meju přestorčene. Wšitke do toho planowane zarjadowanja wupadnu. Zastupne lisćiki pak wostanu płaćiwe resp. budu narunane.
Weirather karjeru zakónčiła
101 inficěrowany we wokrjesu
Budyšin. Z třinaće wosobami wjace hač dźeń do toho je mjeztym 101 z coronawirusom natyknjeny w Budyskim wokrjesu, kaž wčera rěkaše. Ličba dotal postajenych karantenow je na 995 rozrostła. Faktisce je nětko 775 wosobow w karantenje, dokelž su wjacore zakónčene. Z dwěmaj dalšimaj wosobomaj je so aktualnje sydom inficěrowanych wustrowiło, jedyn bě minjeny tydźeń zemrěł.
Mnohe přestupjenja zakaza
Drježdźany. W Sakskej je policija mnohe přestupjenja zakaza kontakta zwěsćiła. Tak su zastojnicy mjez druhim wjacore grilowanske partyje zakónčili. Kaž krajny policajski předsyda Horst Kretzschmar přez Twitter zdźěli, registrowachu po cyłej Sakskej dotal 83 přestupjenjow, 224 króć dyrbješe policija zakročić, zo by zakaz přesadźiła. Zwjetša ludźo twjerdźa, zo ničo wo postajenju njewědźa.
Wólby wjesnjanostow přestorča
Smědźa wotewrjene wostać
Budyšin. Sakske knježerstwo je wobmjezowanja, haćić coronawirus, jasnišo sformulowało. Kaž ratarski minister Wolfram Günther (Zeleni) wčera zdźěli, smědźa zahrodnistwa a štomownje, w kotrychž swójske rostliny plahuja a z nimi wikuja, wotewrjene wostać. To płaći mjez druhim za Holešowske zahrodnistwo Matijasa Pěčki a za Wudworske Krollec zahrodnistwo.
Projektny dźeń wotprajeny
Budyšin. Wukaz sakskeho kultusoweho ministerstwa z 13. měrca zakazuje wšitke zwonkašulske zarjadowanja, wubědźowanja, olympiady, powołanske praktikumy, šulerske abo wučerske wuměny hač do kónca šulskeho lěta. Tak je tež projektny dźeń serbskich institucijow 14. julija k powołanskej orientaciji w Budyskim Němsko-Serbskim ludowym dźiwadle wotprajeny.
„Seniorski“ nakupowanski čas
86 wosobow inficěrowanych
Budyšin. Ličba w Budyskim wokrjesu z coronawirusom inficěrowanych je so na 86 powjetšiła, kaž Budyski krajnoradny zarjad wčera zdźěli. To je jědnaće wjace hač dźeń do toho. Dotal postajenych karantenow je na 783 přiběrało, faktisce pak je tuchwilu 625 ludźi w karantenje, dokelž su ju wjacori zakónčić móhli. Dwě wosobje stej so zaso wustrowiłoj.
Sakski informaciski portal
Drježdźany. Za wšitke prašenja, kak mamy z coronawirusom wobchadźeć, je sakske knježerstwo na stronje www. coronavirus.sachsen.de centralny informaciski portal kaž tež wjacore wobydlerske telefony zarjadowało. Wšitcy wobydlerjo su namołwjeni, so tam wo nowych postajenjach, pokiwach a naprawach knježerstwa informować.
Němcy zakaz ranja
Třećina wjace natyknjenych
Budyšin. Dwanaće ludźi wjace hač dźeń do toho bě wčera w Budyskim wokrjesu z coronawirusom natyknjenych, to je třećina wjace. Zwjetša su to ludźo, kotřiž su z rizikowych kónčin nawróćili. Dohromady 48 wosobow je Budyski krajnoradny zarjad wčera popołdnju jako inficěrowanych zwěsćił. Ličba postajenych karantenow pak pomjeńši so na 470. Prěni inficěrowany je so mjeztym wustrowił.
Krajna wustajeńca přestorčena
Drježdźany/Zwickau. Za 25. apryl planowane wotewrjenje 4. krajneje wustajeńcy „Boom – 500 lět industrijna kultura w Sakskej“ je wotprajene. To staj sakska ministerka za kulturu Barbara Klepsch (CDU) a direktor Němskeho hygienoweho muzeja prof. Klaus Vogel wčera w Drježdźanach zdźěliłoj. Na wjacorych městnach w Zwickauwje wotměwacu so přehladku nětko na njewěsty termin přestorča.
Vietnamska ludnosć pomha
Europeada přestorčena
Flensburg/Budyšin. Federalistiska unija europskich narodnych mjeńšin za lětsa planowanu koparsku europeadu na klětu přestorči. To zdźěli nowinski rěčnik Domowiny Marcel Brauman. Přičina je połoženje coronawirusa dla. Kaž ze zdźělenki wuchadźa, wotměje so europeada tuž klětu w juniju pola Korutanskich Słowjencow w Awstriskej.
36 natyknjenych we wokrjesu
Budyšin. Ličba z coronawirusom inficěrowanych we wokrjesu Budyšin raznje přiběra. Kaž Budyski krajnoradny zarjad wčera popołdnju zdźěli, je dotal ze 36 wosobami dwanaće wjace hač dźeń do toho z nowym wirusom natyknjenych. Z toho pochadźa wosom z Wojerowskeje, třinaće z Kamjenskeje a 15 z Budyskeje kónčiny. Dwě wosobje stej ćežko schorjełoj. Jej w klinice zastaruja.
Serbski muzej zawrjeny
Nowa rektorka uniwersity
Drježdźany. Rozšěrjeny senat Drježdźanskeje Techniskeje uniwersity je wčera psychologowku a profesorku dr. Ursulu M. Staudinger za rektorku wuzwolił. Staudinger je po cyłym swěće připóznata slědźerka na polu staroby. Tuchwilu ma profesuru za sociomedicinske wědomosće na Columbia Aging Centeru New-Yorkskeje uniwersity, kotryž je lěta 2013 załožiła. Wona naslěduje prof. dr. Hansa Müllera-Steinhagena, kiž dźe na wuměnk.
Kurs přestorčeny
Budyšin. Lětuši ferialny kurs za dźěći Rěčneho centruma WITAJ dyrbi coronawirusa dla wupadnyć. Na to stej so nawodnica RCW dr. Beata Brězanowa a zamołwita za projekt Michaela Hrjehorjowa póndźelu připołdnju dojednałoj. Projekt klětu w jutrownych prózdninach dale powjedu. Je to jenički móžny termin, dokelž maja tón tydźeń dźěći nimale po wšej Němskej prózdniny.
Forum wotprajili
Olympiada přestorčena
Budyšin. 54. centralnu olympiadu serbskeje rěče, kotraž bě za spočatk apryla planowana, přestorča. Přizjewiło je so 14 wučerjow a 83 šulerjow, mjez nimi 31 z Delnjeje Łužicy. Nowy termin za olympiadu planuje Serbske šulske towarstwo w oktobru. Potom budu so šulerjo nětčišeho 6. lětnika wubědźować. Dale přestorči SŠT za 27. měrc planowanu prezentaciju delnjoserbskeje webstrony www.dyrdomdej.de.
Towarstwo so njeschadźuje
Praha/Budyšin. Towarstwo přećelow Serbow (SPL) w Praze je wšitke swoje planowane zarjadowanja na wěsty čas wotprajiło, štož płaći za přichodne tydźenje. Jasne tež njeje, hač budu jutry na wuprawje we Łužicy. Kaž hižo zańdźene lěta chcychu z busom na křižerjow přijěć. Hłownu zhromadźiznu SPL runje tak přestorči kaž předwidźane wustajeńcy a přednoški w Praze a Liberecu.
Łódźnicy njemóža na dźěło