Policija (08.07.21)
„Doris“ z tykancom wabiła
Rychwałd. Zaso raz chcychu njeznaći ludźom po telefonje pjenjezy wulišćić. 70lětnu žonu w Rychwałdźe (gmejna Hamor) je předwčerawšim jeje pozdatna znata „Doris“ zazwoniła. Wona bě pječa runje w bliskosći a by za spontany wopyt tykanc sobu přinjesła. Při tej składnosći by sej rady 30 000 eurow wupožčiła, z kotrymiž chcyše dom kupić. Dokelž pak rentnarka telko pjenjez doma njeměješe, so „Doris“ dale prašeše, hač su pjenjezy snano na bance abo hač ma žona doma debjenki. Poněčim poča 70lětnej switać, zo runje z wobšudnicu rěči. Tak skónči telefonat a zawoła policiju.
Policija (07.07.21)
Za jězdźenje přemučny był
Čorny Chołmc. Wulkotnje reagowała je předwčerawšim 40lětna wodźerka awta na zwjazkowej dróze B 97 pola Čorneho Chołmca, jako před njej Škoda po puću tam a sem a zdźěla na woběmaj jězdnjomaj jězdźeše. Wona Škodu přesćahny, zadźerža ju a zazwoni policiju. Při alkoholowym tesće so wukopa, zo bě 44lětny šofer dospołnje strózby. Wón pak přizna, zo bě chětro mučny. Policistam bě spěšnje jasne, zo muža takle dale jězdźić njedadźa. Tuž jeho sami k jeho bydlenju dowjezechu, kaž w nowinskej zdźělence Zhorjelskeje policajskeje direkcije rěka. 44lětny změje so přiwšěm wohroženja nadróžneho wobchada dla zamołwić. Policija so žonje za kedźbliwosć dźakuje.
Dźěl kolesa spakosćili
Budyšin. Wot kolesa při Budyskich Schillerowych zelenišćach su njeznaći předwčerawšim prědnje koło wotšrubowali a sobu wzali. Hódnotu rubizny trochuja na něhdźe 120 eurow. Kriminalna słužba Budyskeho rewěra před přepytuje.
Policija (06.07.21)
Třo ćežko zranjeni při njezbožu
Horni Wujězd. Při najězdźe Horni Wujězd na awtodróhu A 4 do směra na Drježdźany je wčera wokoło 11 hodź. k ćežkemu njezbožu dóšło. Šoferka wosoboweho awta VW Touran přewidźa při wotbočenju na A 4 napřećo jěducy Škoda, kotryž měješe předjězbu, a zrazy do njeho. Tři wosoby so při tym ćežko zranichu, tři dalše lochko. Wohnjowi wobornicy z Hornjeho Wujězda a z Jědlicy kaž tež policija běchu spěšnje na městnje. Za čas wobdźěłanja njezboža dóńdźe do wšěch směrow ke kopjenju wobchada, dokelž je tež Porchowski najězd na A 4 twarskich dźěłow dla zawrjeny.
Policija (05.07.21)
Njeznaći wobsah kasety pokradnyli
Łaz. Dotal njeznaći su w času wot 1. julija nawječor do 3. julija nawječor parkowanski awtomat na přibrjoze Třižonjanskeho jězora we Łazu skóncowali a z njeho pjenježnu kasetu pokradnyli. Kelko pjenjez je w njej było, dotal znate njeje. Wěcna škoda wučinja něhdźe tysac eurow.
Při wróćostorkanju njekedźbował
Běła Woda. Na Heinricha Heinowej w Běłej Wodźe je sobotu dopołdnja 44lětny ze swojim awtom marki Opel ducy z ležownosće wróćo wujěł. Při tym zrazy do wosoboweho awta marki Mercedes, kotryž tam parkowaše. Cyłkowna škoda wučinja 2 200 eurow.
Policija (02.07.21)
Bankownica kedźbliwa była
Kulow. Wobšudnicy po telefonje su póndźelu 81lětnu rentnarku poćežowali. Žona z Noweje Wsy pola Kulowa bě sej wěsta, zo žadyn dołh nima, čuješe pak so pod ćišć stajena. Tak so rozsudźi žadanu sumu 1 500 eurow zapłaćić. Sobudźěłaćerka banki pak je ju na móžne wobšudnistwo skedźbniła a přeswědči starušku, pjenjezy njepřepokazać, ale so radšo na policiju wobroćić.
Policija (01.07.21)
Sprawna wobydlerka
Wojerecy. 77lětna žona je wutoru dopołdnja na policajski zarjad we Wojerecach přišła. Při sebi měješe móšnju z pjenjezami, dokumentami a pjenježnej kartku, kotrež bě na Radskej dróze namakała. Krótko na to přizjewi so 84lětna žona, zo by tam swoju zhubjenu móšnju přizjewiła, a ju nablaku zaso dósta. Wulki dźak słuša sprawnej namakarce.
Papagaj přilećał
Běła Woda. Wobydlerka Gutenbergoweje w Běłej Wodźe měješe wutoru njewočakowany wopyt. W nocy bě papagaj z wotewrjenym woknom do jeje bydlenja přilećał. Nětko so zwěrinoškitne towarstwo tak dołho wo ptaka stara, doniž sej mějićel po njeho njepřińdźe.
Policija (30.06.21)
Ćežke njezbožo na A 4
Słona Boršć. Wčera krótko do połnocy sta so na awtodróze A 4 mjez Hornim Wujězdom a Słonej Boršću ćežke wobchadne njezbožo. Z dotal njeznateje přičiny zrazy transporter marki Renault za wotpočnišćom Hornja Łužica do transportera marki Fiat. Renault na to z dróhi zjědźe a prasny do štoma, při čimž so wodźer awta ćežko zrani. Šofer Fiata wosta njezranjeny. A 4 běše tři a poł hodźiny dospołnje zawrjena a wobchad so po dołhosći pjeć kilometrow kopješe. Policija přičiny njezboža nětko přepytuje.
Policija (29.06.21)
Do štoma zajěł
Rakecy. Póndźelu popołdnju je wodźer VWja Caddy na zwjazkowej dróze B 96 mjez Rakecami a Budyšinom w křiwicy z awtom z dróhi zjěł a do štoma zrazył. W jězdźidle zatłusnjeneho šofera dyrbješe wohnjowa wobora z ćežkej techniku wuswobodźić. Z helikopterom dowjezechu jeho wuchowanske mocy do kliniki. Wohnjowej woborje z Rakec a Njeswačidła stej ze 37 kameradami na městnje pomhałoj. Zwjazkowa dróha bě něhdźe hodźinu za zjawny wobchad dospołnje zawrjena.
Policija (28.06.21)
Awto so paliło
Wojerecy. Na parkowanišću superwikow na Kulowskej dróze we Wojerecach je so sobotu wječor pozdźe paliło. Krótko do połnocy, wokoło 23.25 hodź., su z wosoboweho awta typa Mazda CX 3 płomjenja wysoko k njebju sapali. Wohnjowa wobora zamó je spěšnje zhašeć. Přičiny wohenja policija nětko přepytuje.
Policija (25.06.21)
Kolesa awta kradnyli
Nadźanecy. Wšitke štyri kolesa Mercedesa su njeznaći w nocy na srjedu w Nadźanecach (Nadelwitz) wotšrubowali a sobu wzali. Při dalšim awće su šruby kolesow pušćili, policija wčera zdźěli.
