Policija (20.12.24)

pjatk, 20. decembera 2024 spisane wot:

Wobšudnikam pjenjezy přepokazał

Połčnica. Krótko do hód su njeznaći w Budyskim wokrjesu wobydlerjow za­zwonili a z dubioznymi stawizničkami spytali, jim pjenjezy wulišćić. We wjacorych padach w Budyšinje a Großröhrsdorfje předstajichu so skućićeljo jako policisća abo statni rěčnicy. Potom ludźom napowědachu, zo je jich syn abo dźowka wobchadne njezbožo zawinił/a, při kotrymž je něchtó žiwjenje přisadźił. Na zbožo potrjecheni słuchatko połožichu a tuž žanu pjenježnu škodu njepoćerpjechu. Hinak zeńdźe so mužej w Połčnicy. Pola njeho předstaji so njeznaty jako sobudźěłaćer domjaceje banki. Pječa bě so něchtó po elektroniskim puću do konta muža zadobył. Zo by swoje nalutowanki zawěsćił, dyrbješe wjetšu sumu pjenjez přepokazać. Bohužel to muž čini a tak krótko do hód 5 000 eurow zhubi.

Policija (18.12.24)

srjeda, 18. decembera 2024 spisane wot:

Porsche 90 km/h přespěšnje jěł

Wochozy. Policija je póndźelu popołdnju we Wochozach wodźerja Porsche lepiła, kotryž měješe přewšo nuzne. Na zwjazkowej dróze B 156, hdźež směš 70 km/h spěšnje po puću być, su 528 jězdźidłow kontrolowali. 111 šoferow bě přespěšnych. Z nich ma 41 warnowanski pjenjez zapłaćić, na 70 wodźerjow čaka pokuta. Najspěšniši bě Porsche z němskim čisłom. Jeho wodźerja lepichu ze 160 km/h. Katalog pokutnych pjenjez předwidźi za to dwaj dypkaj w Flensburgu, 700 eurow pokuty a tři měsacy trajacy zakaz jězdźenja.

Policija (16.12.24)

póndźela, 16. decembera 2024 spisane wot:

Awtomat rozbuchnyli

Lutobč. Wulki wrjeskot je w nocy na njedźelu wobydlerjow w Lutobču ze spara torhnył. Něhdźe w 1.30 hodź. su njeznaći při twarjenju na Parkowej cigaretowy awtomat rozbuchnyli. Z kotrym srědkom su to činili, policija dotal wuslědźiła njeje. Při detonaciji je so bliski płót wobškodźił. Wěcnu škodu trochuja na 5 000 eurow. Hač su paduši cigarety abo pjenjezy pokradnyli a jeli haj kelko, dotal znate njeje. Tole je nětko wobstatk přepytowanjow, kotrež je kriminalna słužba Budyskeho policajskeho rewěra přewzała.

Policija (12.12.24)

štwórtk, 12. decembera 2024 spisane wot:

Jězdźer w chorobnym stole znjezbožił

Zhorjelc. Při Naměsće Demiana w Zhorjelcu je wutoru připołdnju wosobowe awto do jězdźerja w elektriskim cho­robnym stole zrazyło. 82lětny chcyše dróhu za parkowacym transportnym awtom přeprěčić. Po zdaću činješe to bjez toho, zo bě na wobchad dźiwał. Ze směra Teichstraße přichadźacy 35lětny šofer awta marki Mitsubishi seniora w chorobnym stole přepozdźe wuhlada a do njeho zrazy. Mediciniska wuchowanska słužba spěšnje na městno přichwata a ćežko zranjeneho do chorownje dowjeze. Wěcna škoda wučinja něhdźe 3 000 eurow. Policija prosy swědkow njezboža wo dalše informacije. Pokiwy podajće policajskej wobchadnej inspekciji pod tel. čo. 03591 3670 abo kóždemu druhemu policajskemu rewěrej.

Policija (11.12.24)

srjeda, 11. decembera 2024 spisane wot:

Na křižowanišću do pěška zrazył

Kamjenc. Póndźelu nawječor je na křižowanišću při Wojerowskej dróze w Kamjencu 59lětny šofer dróhu přeprěča­ceho pěška přewidźał, jako chcyše ze swojim awtom nalěwo wotbočić. Při zražce bu 43lětny pěšk ćežko zranjeny. Wuchowanska mediciniska słužba jeho do chorownje dowjeze. Wěcowna škoda wučinja 500 eurow.

Policija (10.12.24)

wutora, 10. decembera 2024 spisane wot:

Wulka akcija policije praskotakow dla

Kamjenc. Dotal njeznaći su njedźelu popołdnju w bydlenju a na balkonje w domje na Kamjenskej Fichtestraße z praskotakami a hudźbu telko hary „nadźěłali“, zo wjacori susodźa policiju informowachu. Policisća spytachu z 20lětnym po­družnikom bydlenja rěčeć, tón pak jich wohrožowaše naspomnjo, zo ma brónje, z kotrymiž chce so wobarać, je-li do bydlenja zastupja. Policisća zapodachu wozjewjenje přeńdźenja dla a wotsalichu so. Hižo wječor pak ze susodstwa znowa zdźělenku wo sylnej harje praskanja dla kaž tež wo harowacych pjanych wosobach w bydlenju dóstachu. Policistow přewodźachu tónraz wohnjowa wobora a wuchowanska kaž tež specialna słužba. Po diskusiji wotewrě młodostny podružnik zastojnikam durje do bydlenja. Tam pak ani brónje ani dalše wosoby nadešli njejsu.

Policija (09.12.24)

póndźela, 09. decembera 2024 spisane wot:

Do nakupowanišća so zadobyli

Wulka Dubrawa. Njeznaći skućićeljo su so sobotu wječor z namocu do nakupowanišća na Thälmannowej we Wulkej Dubrawje zadobyli. Spakosćili pak ničo njejsu, dokelž zaskoči alarmowa připrawa, tak, zo dyrbjachu městnosć njeskutka nanajspěšnišo wopušćić. Wěcna škoda wučinja něhdźe 4 000 eurow. Kriminalna słužba Budyskeho policajskeho rewěra je slědy na městnje zawěsćiła a pad nětko přepytuje.

Policija (03.12.24)

wutora, 03. decembera 2024 spisane wot:

Namóc mjez dźěćimi

Wojerecy. Njewšědny pad namocy mjez dźěćimi policija nětko we Wojerecach přepytuje. Tam su třo hólcy w starobje dźewjeć do jědnaće lět prěnju adwentnu njedźelu popoł­dnju na Łužiskim naměsće dźesaćlětneho pachoła nadpadnyli, kaž w rozprawje Zhorjelskeje policajskeje direkcije rěka. Po tychle informacijach bě škodowany z přećelom po puću, jako ­jeho tamne dźěći narěčachu. Najprjedy dóńdźe mjez pjerachami k werbalnemu rozestajenju, pozdźišo dźěći kamjenje do sebje mjetachu. Jako nadpadnjenaj hólcaj skónčnje do směra kupnicy na Külzowej hasy ćeknyštaj, tamne dźěći za nimaj spěchachu. Jedyn z nich dźesaćlětnemu z pjasću mjezwoči biješe. Při tym jeho tak zrani, zo dyrbjachu hólca do chorownje dowjezć, hdźež jeho lěkarsce zastarachu. Kriminalna słužba Wojerowskeho policajskeho rewěra přepytuje tónle pad nětko zranjenja ćěła dla. Nimo toho pytaja swědkow, kotřiž su snano něšto wobkedźbowali. Pokiwy přijimuje Wo­jerowski policajski běrow pod telefonowym čisłom 03571 4650 abo kóždy druhi policajski běrow.

Policija (28.11.24)

štwórtk, 28. nowembera 2024 spisane wot:

Amplu skóncowali

Lejno. Na twarnišću při statnej dróze S 234 pola Lejnoho blisko Wojerec su nje­znaći wutoru wjacore akuwy pokradnyli, zdźěla kable roztřihali a zamki skón­cowali. Jeničce rubizna bě 3 000 eurow hódna. Kelko wěcneje škody nimo toho nasta, njeje znate. Nětko pytaja swědkow, kotřiž su w rańšich hodźinach wutory něšto wobkedźbowali.

Policija (27.11.24)

srjeda, 27. nowembera 2024 spisane wot:

Pokradnjeny traktor namakał

Pěskecy. Póndźelu je swědk w lěsu pola Pěskec wotstajeny traktor nadešoł a na to policiju informował. Wukopa so, zo běchu njeznaći skućićeljo nowu ratarsku mašinu w minjenym tydźenju na ležownosći předewzaća w Pančicach-Kukowje pokradnyli. Při njeskutku pak paduši ­wosebje skedźbni njeběchu a něhdźe 95 000 eurow hódny traktor wobškodźichu. Cyłkowna suma wěcneje škody dotal hišće njepředleži. Policisća su slědy na městnje zawěsćili a traktor typa Massey Ferguson wobsedźerjej wróćili. Krimi­nalna słužba w Kamjencu nětko pad přepytuje.

HSSL24

Chróšćan Šulerjo

nowostki LND