Policija (30.09.21)
Šofer drogi při sebi měł
Hamor. Na pokiw wobydlerjow su zastojnicy z Běłeje Wody a Ludwigsdorfa zawčerawšim blisko Rychwałdskeje jamy podhladne awto kontrolowali. Šofera, kotrehož móžneho přesmykowanja ludźi přez hranicu dla zwjazkowej policiji přepodachu, měješe pjenjezy wjacorych změnow kaž tež drogi při sebi.
Policija (29.09.21)
Zwučowanja za hortske dźěći
Wojerecy. Njeje scyła lochko po wěstym puću dróhu překročić. To zwěsćichu tele dny hortske dźěći z Wojerec. Póndźelu popołdnju su wone pod dohladom policajskeju zastojnikow zwučowali, zo bychu na kóncu přijeli pas za pěškow. Kedźbliwje a z wulkej zahoritosću su so dźěći w starobje šěsć do sydom lět na praktiskim treningu w ramiku wobchadneho kubłanja wobdźělili. Wobydlerskej policistaj běštaj jim w zašłych tydźenjach teoretiske zadźerženje jako pěšk wujasniłoj. Nětko su dźěći cyle praktisce zwučowali, swoju wědu w zjawnym wobchadźe dopokazali a z wulkim wjeselom jednotliwe nadawki pod kedźbliwym wóčkom policistow zmištrowali. K zakónčenju prewenciskeho zarjadowanja a po wuspěšnym dokonjenju wšitkich zwučowanjow staj jim zastojnikaj přepodałoj požadany pas za pěškow a zešiwk Poldi.
Policija (28.09.21)
Pozdatneju zadobywarjow zajeli
Wojerecy. Njedźelu su zastojnicy policije we Wojerecach pozdatneju zadobywarjow zajeli. Młodaj Němcaj w starobje 24 a 32 lět běštaj wokoło połnocy z kolesom po měsće jěłoj. Při kontroli namakachu policisća předmjety, kiž buchu po wšěm zdaću samsny dźeń popołdnju při zadobywanju do bydlenja na Frederica Joliota Curiejowej pokradnjene. Mjez druhim běchu so tam laptop, tablet, debjenki a něhdźe 8 000 eurow zhubili. Při sebi měještaj mužej zdobom něhdźe dźesać gramow kristalinoweje substancy, po zdaću crystal, kaž tež. dalše pokradnjene wěcy.
Policija (27.09.21)
Šepjerjate wotpadki so palili
Budyšin. Na Budyskej Alberta Einsteinowej je powołanska wohnjowa wobora wčera wječor woheń hašeć dyrbjała. Wokoło 20.30 hodź. počachu so tam z dotal njeznateje přičiny spěrawe wotpadki palić, kotrež ležachu pódla kontejnera za staru drastu. Pěšcy běchu woheń widźeli a nuzowe čisło wolili. Policija so nětko z naležnosću zaběra.
Policija (24.09.21)
Pjany z kolesom po puću był
Wjazońca. Policija je wčera we Wjazońcy napadneho kolesowarja lepiła. Kontrola wujewi pola 37lětneho alkoholowu hódnotu 1,66 promilow, a policija wozjewi jeho wopojenosće we wobchadźe dla.
Policija (23.09.21)
Bjez jězbneje dowolnosće po puću był
Budyšin. Na Budyskej Sukelnskej je policija wutoru popołdnju 32lětneho šofera wosoboweho awta zadźeržała. Při přepruwowanju jeho datow zastojnikaj zwěsćištaj, zo bě muž bjez jězbneje dowolnosće po puću. Zdobom běše wón drogi brał a měješe w awće po zdaću kradnjene wěcy. Mjez druhim běchu to hišće originalnje zapakowane parne rjedźaki a prochsrěbaki. Nastroje policija sćaza, dowjeze wodźerja awta k wotedaću kreje a wozjewi jeho pozdatneho padustwa dla. Policija pad přepytuje.
Policija (22.09.21)
Šulu ewakuować dyrbjeli
Malešecy. Jako reakciju na wjacore hrožace mejlki su policisća póndźelu rano Malešansku šulu přepytali. Dotal njeznaći skućićeljo běchu šuli sobotu do toho hrožace powěsće słali. Za přepytanje zasadźichu zastojnicy na rozbuchlinu specializowaneho psa. W tym času dyrbješe 320 šulerjow dom wopušćić. Wokoło 11 hodź. přepytowarjo warnowanje zběhnychu, tak zo su dźěći a młodostni zaso do swojich rjadownjow móhli.
Policija (21.09.21)
W kuchni so paliło
Pančicy-Kukow. Wohnjowe wobory z Pančic-Kukowa, Wotrowa, Žuric a Chrósćic dyrbjachu njedźelu připołdnju w Pančicach-Kukowje woheń hašeć, kiž bě w bydlenskim domje na Halštrowskej wudyrił. Jako něhdźe 30 kameradow tam dojědźe, so z woknom kuchnje hižo husty kur waleše. Spěšneho zapřimnjenja wobornikow dla, ale tež dźakowano přizjewjakej kura w domskim móžachu rozpřestrěću płomjenjow na dalše rumnosće zadźěwać. Přičinu wohenja policija nětko přepytuje.
Podružnik ničo njepytnył
Wojerecy. W nocy na minjenu njedźelu je w bydlenju na Steinbrückowej we Wojerecach woheń wudyrił. Hosćo dróhoweho swjedźenja w susodstwje informowachu wohnjowu woboru. 37lětny podružnik bydlenja njebě sam ničo pytnył. Rozměr škody dotal jasny njeje.
Policija (20.09.21)
Woheń w dźěćacej stwě
Budyšin. Wohnjowa wobora, policija a pomocnicy chwatachu wčera rano krótko po wosmich na Budysku Lützowsku. Tam bě so z dotal njeznateje přičiny w dźěćacej stwě jednoswójbneho domu paliło. Wohnjowi wobornicy dyrbjachu špundowanje wočinić. Dźakowano přizjewjakej kura móžachu hóršemu zadźěwać. Spjacy wobydlerjo wostachu njezranjeni. Wěcna škoda wučinja wjacore tysacy eurow.
Policija (17.09.21)
Do wobchoda so zadobyli
Wojerecy. W nocy na srjedu su so njeznaći we Wojerecach do wobchoda na Budyskej aleji zadobyli. Z njeho spakosćichu woni najwšelakoriše nastroje w hódnoće wjac hač 600 eurow. Nimo toho su paduši wěcnu škodu 150 eurow načinili.
