Budyšin (CS/SN). Mjeztym hižo pjatnaty raz přewjeduja tuchwilu nachribjetnikowu akciju ewangelskeho cyrkwinskeho wobwoda Budyšin/Kamjenc za partnerski wobwod Meru w Tansaniji. Byrnjež lětuše wobstejnosće koronapandemije dla trochu wobćežniše byli, su wěriwi z wjacorych wosadow kaž tež dźěći ze šulow a pěstowarnjow něhdźe 3 000 šulskich nachribjetnikow napjelnili.
Wosebje wuzběhnyć smě so Serbska zakładna šula Budyšin. Tam su hižo krótko po zahajenju akcije 11. nowembra 2020 na wšěch 76 nachribjetnikow spakowali. Dalše tysac nachribjetnikow móžachu dźakowano pjenježnym daram kupić a pjelnić. Kóžda toboła wobsahuje šalku, taler, łžicu kaž tež trjenjo, zešiwki a wšelake pisaki.
Nachribjetniki dowjezechu minjene dny do bróžnje w Smochćicach. Dźesać dobrowólnych pomocnikow spakowa je tam do přećahowanskich kartonow. Něhdy běchu za to bananowe kisty wužiwali. To pak hižo dowolene njeje, dokelž mějachu wone dźěrki za přewětrjenje. Nowe kartony je nětko přećahowanska firma Gäbler ze sprjewineho města sponserowała.
