Prěnje zaćišće z wědomostneho přewodźowanja lětušeje Europeady

Köln (SN/bn). „Europeada 2024 bě jara derje organizowany turněr z přihódnje spřihotowanymi hrajnišćemi a wuběrnej naladu na wopytowarskich tribunach – znajmjeńša wšudźe, hdźež Serbja sobu skutkowachu. Za jeničku kapku połona mam dosć wulke distancy mjez hrajnymi městnami.“ Z tymle słowami zjima dr. Kristian Naglo, wědomostny sobudźěłaćer Instituta za europske wuwiwanje sporta a přeslědźenje wólneho časa při Němskej wysokej šuli za sport Köln, powšitkownje lětuše koparske mišterstwo europskich mjeńšin na sewjeru Němskeje a juhu Danskeje. W nadawku Serbskeho instituta bě wón turněr ze zaměrom přewodźał, jón „ze sociologiskeje perspektiwy přepytować“.