Přiražka zawěsćena
Gmejna transNaturalu z 8 800 eurami spěchuje
Hamor (AK/SN). Komuna Hamor lětuši swěco-zwukowy festiwal transNaturala při Bjerwałdskim jězoru z 8 800 eurami z gmejnskeho etata spěchuje. To su radźićeljo wčera jednohłósnje wobzamknyli. Přiražka słuži prěnjorjadnje tomu, zachować kwalitny narok zarjadowanja, štož je w zjawnym zajimje. Z přiražku chcedźa atraktiwnu laserowu show na Hamorsku milinarnju kaž tež tradicionalny wohnjostroj zawěsćić. Pjenjezy maja so nimo toho za zwukowe elementy w swjedźenskim stanje a w Dźiwadle we wuchu nałožić. Cyłkownu spěchowansku sumu přewostaja zarjadowarjej festiwala, Drježdźanskej firmje foundation-entertainment. Zakład zrěčenja firmy z Hamorskej gmejnu wo spěchowanju je wobzamknjenje gmejnskeje rady z 15. januara 2015. Tehdy je so gmejnski parlament k transNaturali wuznał a organizowanje festiwala Drježdźanskej firmje přepodał. „Mjeztym smy tójšto pjenježnych darow a sponsorskich srědkow dóstali“, wujasni Roman Krautz. Wot lěta 2010 je wón koordinator projekta Bjerwałdski jězor.
Wikowarjo hornčerjej rady poboku
Hózk (UH/SN). Daloko znata je hornčernja Gleinig, kotraž w bywšim Hózkowskim młynje nad Klóšterskej wodu swoje wudźěłki produkuje. Prawidłownje staj Gunda Gleinig a jeje žiwjenski partner Christian Schmidt po puću, zo byštaj na hermankach, wikach a swjedźenjach swoju keramiku poskićałoj a předawałoj. Před tydźenjomaj na přikład běštaj w Jenje na wikach. Jónu wob lěto, tradicionelnje druhi kónc tydźenja w awgusće, pak twaritaj sej doma swoje stejnišćo – na idyliskim štyristronskim statoku. To wědźa tež daloko za mjezami wsy, a tak je sej na lětušu přehladku tež wjele ludźi z Chrósćic, Ralbic a Wotrowa do Hózka dojěło.
Na Klukšanskim lětanišću je wčera popołdnju sportowe lětadło ...
Twarnišćona Listowej
Budyšin (SN/CoR). Wot minjeneje srjedy hač do najskerje 9. oktobra dźěłaja na wysokoćišćowym płunowym wodźe na Mužakowskej dróze w Budyšinje. To zdźěli dźensa zarjad města. Započeli su na wotbóčce Friedricha Listoweje, nětko chcedźa z twarskimi dźěłami do směra na Strowotnu studnju pokročować. Wobłuk křižowanišća mjez Mužakowskej dróhu a Friedricha Listowej wostanje hač do 21. awgusta zawrjeny. Awtowy dom Ruffert a přemysłowy park Scharf stej tuchwilu jenož přez křižowanišćo Wobkruh Strowotneje studnje docpějomnej. Hakle wot soboty, 22. awgusta, budźetej Friedricha Listowa a wobłuk křižowanišća Mužakowska/Listowa zaso za awta wotewrjenej. Tak budźe Serbski šulski a zetkawanski centrum z měšćanskeho směra spočatk šulskeho lěta zaso přistupny.
Mužakowska budźe mjez křižowanišćomaj Listoweje a Wobkruha Strowotneje studnje hač do pjatka, 9. oktobra, dospołnje zawrjena. Potrjechenych chce město Budyšin wo postupowanju twarskich dźěłow běžnje informować.
Krótkopowěsće (14.08.15)
Derje hospodarili
Drježdźany. Sakske města, wjesne gmejny a wokrjesy steja na krutym financnym zakładźe. Wone zwoprawdźichu loni cyłkownje 326 milionow eurow nadbytka, potajkim 81 eurow na wobydlerja. Po cyłej Němskej je jenož Bayerska hišće wjace nahospodariła. Z nadbytkom hodźa so wšelake trěbne inwesticije derje zwoprawdźić.
Karpy za powětrom łója
Chrjebja. Tuchwilna horcota načinja łužiskim karpam widźomne ćeže. Wyšich wodowych temperaturow dla spaduje podźěl kislika we wodźiznach. W mnohich hatach łužiskich rybarjow samo woda pobrachuje. Zo njebychu ryby přidatnemu stresej wustajili, su w Chrjebjanskim rybarskim zawodźe započeli rybam mjenje picy dawać.
Financny zakład steji
Neugersdorf. Sponsorske zrěčenje lutowarnje Hornja Łužica-Delnja Šleska z koparskim mustwom FC Hornja Łužica Neugersdorf je podlěšene. Po postupje mustwa do regionalneje ligi su zdobom nowe kondicije wujednane. Wažny financny zakład za hospodarjenje koparskeho kluba je tuž zawěsćene.
Dynamo nětko načolnik
Policija (13.08.15)
Janšojce. Wot 25. julija pytaja za 15lětnej Susannu Göthel z Drježdźan. Wona bě w Janšojskim zarjadnišću projekt „Neustart“ zaměstnjena. Kaž policija dźensa zdźěli, je młodostna přebywanišćo do njeznateho směra wopušćiła. Zastojnicy nětko tež w Hornjej Łužicy za něhdźe 165 centimetrow wulkej, čerwjenowłosatej šwižnej holcu w čornym kožanym kabaće a čornych legginsach pytaja. Dotal ju tež po přepruwowanju kontaktnych adresow w Drježdźanach našli njejsu. Pokiwy přijimuje Choćebuska policajska direkcija pod telefonowym čisłom 0355/ 49 37 12 27.
Tři Hwězdy. Dokelž je wutoru popołdnju Peugeot, kotryž chcyše nalěwo na awtodróhu wotbočić, jemu napřećo přijěducemu VWjej předjězbu wzał, awće do so zrazyštej. 28lětna sobujěduca a tři dźěći w Peugeoće so lochko zranichu, 85lětna sobujěduca w VWju ćežko.
Swójbny dźeń w parku
Mały Wjelkow (SN). Prěni króć kooperujetej sakski krajny zwjazk Čerwjeneho křiža (DRK) a Małowjelkowski prazwěrjenc. Jutře, 14. awgusta, wotměje so w parku sawrierow swójbny dźeń, za kotryž maja tójšto atrakcijow za dźěći přihotowane. Na přikład móža sej hólcy a holcy chorobny wóz DRK wobhladać.
Mnohich doma hladaja
Budyšin (SN). Kaž zamołwići wikowanskeje chorobneje kasy (KKH) Budyskeho wokrjesa zwěsćeja, su přistajeni hladanskich słužbow w nadawku KKH potrěbnych w minjenych měsacach zwjetša doma zastarali. 72 procentow z wjace hač 56 000 hladanja potrěbnych su wukubłane sotry doma zastarali. Při tym leži domjace hladanje po zdźělenju Zwjazkoweho statistiskeho zarjada po dwěmaj třećinomaj w rukach přiwuznych, tamny dźěl zaručeja – zdźěla kompletnje – ambulantne słužby.
Specielne čaporowe wiki
Wobornicy wjele přiwuknyli
Wysoki niwow sakskeho cupa Blunjanskich kameradow přeswědčił
Łuty (AK/SN). Dwanaće mustwow z cyłeje Sakskeje je so njedawno při tłóčacej horcoće na sportnišću we Łutach k wohnjowobornemu sakskemu cupej hašenja zetkało. Po Haynje pola Schkeuditza a Blunju bě to třeće z cyłkownje štyrjoch wubědźowanjow.
Bydlenje na prěnim poschodźe farskeho domuprózdne steji
Nimo cyrkwjow su tež farske domy něme swědki stawiznow. Ze swojej lětnjej seriju so po serbskich a dwurěčnych katolskich a ewangelskich wosadach rozhladujemy a předstajamy někotre fary – dźensa Wotrowsku.
Prěni raz pisomnje mjenowany je Wotrow 1319 jako Oztrow. Hač do reformacije słušeše wjes do Hodźijskeje a po tym 200 lět do Chróšćanskeje wosady. Jakub Jan Józef Wóski, biskop a Budyski tachant, kupi 1755 Pjelcec kubło we Wotrowje, kotrež bě so lěto do toho na swjatoh Měrćina wotpaliło. Wóski so wo to postara, zo buchu dwuposchodowe domske jako farski dom, bróžeń, hródźe a kólnja zaso natwarjene. Wot 1758 hač k dotwarej cyrkwje 14 lět pozdźišo swjećachu wosadni w farskim domje Bože mšě. Jako prěnjeho duchowneho we Wotrowje zasadźi biskop Jurja Běra, kiž bě do toho druhi kapłan w Chrósćicach, a to jako administratora. Po nim bě tam Jan Kral sydom lět administrator, zemrě pak hakle 34lětny. Wón je 1764 Wotrowsku šulu dotwarił. Hižo šěsć lět do toho wšak běchu započeli cyrkej twarić, štož po wjacorych ćežach 1772 dokónčichu.
