Ludźo derje informowani
Přednoški a ekskursije wo wjelkach žněja dobry wothłós
Rěčicy (SN/mwe). Hižo lěta poskića Rěčičanski wjelči kontaktny běrow přednoški na temu „wjelk“. Wosebje zarjadowanja, na kotrychž wotměwaja so nimo přednoškow abo ekskursijow na slědach wjelkow tež „dny a wječory we wjelčim teritoriju“, žněja mjez ludźimi dobry wohłós. Na nje přichadźa 15 do 25 wobdźělnikow. „Často dyrbimy zajimcam wotprajić, dokelž je zarjadowanje hižo wuknihowane. Nimo tudyšich wobydlerjow wabja přednoški tež zajimcow ze wšeje Sakskeje a samo turistow z druhich zwjazkowych krajow Němskeje“, zdźěli Serbskim Nowinam Vanessa Ludwig, projektowa nawodnica w kontaktnym běrowje.
Statok ze solarnej tankownju
Koncept za eBayjowu wjes Liboń je skónčnje běrokratiske ćeže přewinył. Hišće tónle tydźeń tam twarić započnu. Wutwarjeć chcedźa ležownosć na energijowy a dožiwjenski statok.
Liboń (UM/SN). Štyri twarjenja, studnja, hat a žołtej wjesnej tafli: To je Liboń – najmjeńša wjes Sakskeje. Jako „eBayjowa wjes“ bu wotležany štyristronski statok daloko znaty. Wšako chcyše jón bywši wobsedźer w lěće 2012 přez internetnu platformu eBay předać. Tole pak so jemu poradźiło njebě. Tróšku pozdźišo zajimowaše so Andreas Reitmann za objekt, dokelž je wot znatych pokiw dóstał. Skónčnje z Drježdźan pochadźacy předewzaćel statok kupi. Liboń měł so na modelowu wjes za socialne a skutkowne žiwjenje wuwiwać. To pak bě plan, kotryž njehodźeše so z twarsko-prawniskich přičin realizować.
Třiceći serbskich seniorow je so wčera w Chróšćanskim hosćencu ...
Insekty powědaja wo přirodźe
Z nowej techniku
Budyšin (SN). Wokrjes Budyšin je we wobłuku njepolicajskeho wotwobaranja strachow wozydła katastrofoweho škita a wuchowanskeje słužby hižo na digitalnu škričkowansku techniku přestajił. Nimale dokónčene su tež dźěła we wobłuku wohnjowych woborow. Poslednjej dwě wohnjowobornej wozydle w Budyskim wokrjesu matej so pjatk na nowu, jara wukonitu digitalnu techniku přestajić. Kaž krajnoradny zarjad zdźěli, stej to tankowe hašenske wozydło a małohašenske wozydło Wósporskeje dobrowólneje wohnjoweje wobory.
W Budyskim wokrjesu su nimale 400 komunalnych wozydłow wohnjoweje wobory z nowej techniku wuhotowali.
Krótkopowěsće (28.07.15)
Lětnje dźiwadło w oktobrje
Budyšin. Prěni raz w stawiznach Budyskeho lětnjeho dźiwadła chce NSLDź inscenaciju pod hołym njebjom na hłownym jewišću pokazać. Wulkeho naprašowanja dla předstaja přewšo wuspěšny kruch „My Fair Lady“ 30. a 31. oktobra w 19.30 hodź. a 1. nowembra w 17 hodź. na hłownym jewišću. Předpředań lisćikow je so dźensa započała.
Segwayje zakazane
Praha. W centrumje čěskeje stolicy je na chódnikach dźeń a wjace dwukolesatych elektriskich segwayjow po puću; často wone tež pěškow wohrožeja. Po čěskich zakonjach pak wone na dróhi njesmědźa. Někotre Praske radnicy spytaja problem ze zakazami rozrisać – segwayje njesmědźa wot najnowšeho na přikład na kupu Kampa abo na Vyšehrad.
Železnica chce městna šmórnyć
Berlin. Němska železnica po špatnej bilancy prěnjeho połlěta wottwar dźěłowych městnow hižo njewuzamkuje. Konkretne namjety chcedźa na posedźenju dohladowanskeje rady w decembru předpołožić, kaž šef předsydstwa Rüdiger Grube dźensa w Berlinje připowědźi. Železnica je ze 196 000 přistajenymi jedyn z najwjetšich dźěłodawarjow Němskeje.
Nowe hrajkanišćo přepodate
Budyšin (SN). Twarski měšćanosta Peter Hesse a financny měšćanosta Budyšina Michael Böhmer (wobaj CDU) zašły pjatk na Flincowej nowe hrajkanišćo přepodałoj. Na něhdźe 800 kwadratnych metrach maja dźěći nětko tež krosnowansku připrawu. Płaćiło je hrajkanišćo něhdźe 115 000 eurow.
Drježdźansku dróhu dale twarja
Budyšin (SN). Hišće tutón tydźeń maja wšelake twarske firmy na Drježdźanskej dróze w Budyšinje ceptar přewzać. Na cyłkownje štyrjoch wotrězkach chcedźa twarscy dźěłaćerjo wšelake syće do zemje kłasć kaž tež přijězdy a busowe zastanišća wobnowić. Nimo toho pokryja dróhu z nowej worštu. Tute naprawy pak njejsu bjez wobmjezowanjow wobchada zwoprawdźomne.
Do šulow inwestować
Policija (28.07.15)
Biskopicy. Dźensa w nocy su so njeznaći do insolwentneho kulturneho domu w Biskopicach zadobyli. Přeryli su tam wjacore rumnosće, z kotrychž pokradnychu techniske nastroje a alkoholiske napoje. Nimo toho wohnjohašak sobu wzachu. Dokładne informacije k rozměrej škody njepředleža, kriminalna policija slědźi.
Šumborn. Z dotal njewujasnjeneje přičiny je wčera připołdnju šoferka BMWja mjez Porchowom a Šumbornom (Schönbrunn) z jězdnje zajěła a do mosta zrazyła. Wohnjowi wobornicy z wokoliny dyrbjachu ju ćežko zranjenu z awta wuswobodźić.
Přećiwo infekcijam so skutkownje škitać
Wojerowski klinikum łužiskeje jězoriny poskića zajimcam prawidłowne kubłanja k najwšelakorišim temam. Nimo ryzy medicinskich pokiwow su to tež informacije k hygienje a dowolej.
Wojerecy (SN/mwe). Dosć derje wopytane su we Wojerowskim klinikumje łužiskeje jězoriny informowanske akciske dny pacientow a wopytowarjow. Pod hesłom „30 sekundow, kotrež rozsudźeja – prawa technika je wažna“ wěnowachu so w chorowni minjeny pjatk ručnej hygienje. Po aktualnych studijach so 80 procentow wšěch bacilow přez ruku přenošuje. Hižo 30 sekundow dosaha, zo móžeš so skutkownje přećiwo infekcijam škitać. Čim lěpša desinfekcija je, ćim lěpje su tež pacienća a sobudźěłaćerjo chorownjow před problemowymi bacilemi škitani.
Šulu a móst bórze ponowja
Łazowska gmejna dale zaměrnje do naprawow inwestuje
Łaz (AK/SN). Gmejna Łaz dale zaměrnje do wjesneho dźěla Wulke Ždźary inwestuje. K tomu je so gmejnska rada na swojim njedawnym posedźenju wuprajiła. Jednohłósnje radźićeljo dalši saněrowanski koncept za zakładnu šulu Při Hórnikečanskim jězoru a přepodaće nadawkow za nowotwar mosta „W rěčnym kuće“ wobzamknychu.
W saněrowanskim koncepće za zakładnu šulu su dalše zaměrne inwesticije zapisane. „Na zakładźe tohole koncepta ma so próstwa wo spěchowanje zapodać“, Wolfgang Tietze, nawoda ressorta za twar a imobilijowy management, podšmórny. W lěće 2005 bě Łaz wot něhdyšeje Hórnikečanskeje gmejny nošerstwo zakładneje šule přewzał. Šula pak dźensnišemu standardej hižo njewotpowědowaše. Tuž je gmejna 2008 próstwu wo spěchowanske srědki z programa „šulski nowotwar“ zapodała. Wobjim za to wučinješe něhdźe 2,3 miliony eurow. „Schwalene pak tole njebu“, Tietze rjekny.
