Róžant (aha/SN). Hłowny dypk dnjoweho porjada wčerawšeje zhromadźizny gmejnskeje rady Ralbicy-Róžant bě zabrać stejišćo k twarskej próstwje nastupajo ponowjenje kormjernje swini w Ralbicach. Hižo loni spočatk lěta bě nawodnistwo ratarskeho předewzaća próstwu k nastajenju wobtwarjenskeho plana zapodało. Wo tym je gmejnska rada w aprylu 2014 wuradźowała a plan wotpokazała.
Spočatk meje zapodachu gmejnje planowanske podłožki wo saněrowanju a powjetšenju kormjernje na nětčišim stejnišću wuchodnje Ralbic. Jednaćel Hagen Roßmann planowane změny wčera předstaji. Tak chcedźa tři stare chlěwy spotorhać a nowe natwarić. Tamne štyri modernizuja a tak wuhotuja, zo so imisiske předpisy dodźerža. Dale natwarja juchowej jamje, dosahacej za mnóstwo juchi dźewjeć měsacow. Tuchwilu plahuja w Ralbicach 6 900 swini, z ponowjenjom powjetši so kapacita na 11 400 skoćatow.
Radwor (SN/MWj). Ze swjedźenjom Božeho ćěła katolscy křesćenjo wuznawaja, zo wěrja do přitomnosće Jězusa Chrystusa w swjatym woblatku. Tohodla ćehnjechu dźensa dopołdnja po Božej mši w swjatočnych procesionach k wonkownym wołtarjam, kaž maja tajki na přikład w Radworju tradicionalnje při křižu na nawsy natwarjeny. W procesionje njesechu duchowni pod baldachinom kročo monstrancu z Najswjećišim. Kěrluše kemšerjow přewodźachu zwjetša wosadni dujerjo.
Kaž stajnje za tónle wysoki cyrkwinski swjedźeń běchu so njeličomne holcy družču drastu woblekli. Stawali běchu wone dźensa zdźěla hižo wosrjedź nocy, zo bychu je hotowarniče wšitke sčasom zdrasćili. K dostojnosći Božeho ćěła přinošowachu tohorunja žony, kotrež so k tutej składnosći katolsku swjedźensku drastu woblečechu. Zo so žony, kotrež wšědnje w narodnej drasće chodźa, w běłych płachćičkach na kemšach a na procesionje wobdźěleja, je so mjeztym bohužel nimale dospołnje pozhubiło. W Chrósćicach pak někotre žony tele wašnje žiwe dźerža.
Třěcha kina so sypnyła
Kamjenc. Třěcha bywšeho Kamjenskeho kina je so dźens w nocy sypnyła. Wobydlerjo słyšachu wulki wrjeskot a widźachu mróčel kura. Zranił so na zbožo nichtó njeje. Wohnjowa wobora a techniski pomocny skutk běštej na městnje. Fachowcy pruwowachu, hač wokolnym twarjenjam strach hrozy. Dom njebu hižo wjacore lěta wužiwany.
Zasudźa nadpad
Drježdźany/Wojerecy. Migraciskopolitiska rěčnica frakcije Zelenych w krajnym sejmje Petra Zais nadpad na dom požadarjow azyla we Wojerecach raznje zasudźa. „Je zrudne, ale wěrno, zo njemóža so ćěkancy w Sakskej hižo wěsći čuć“, rěka w jeje zdźělence. Njeznaći běchu w nocy na srjedu spytali dom zapalić, štož pak so jim njeporadźi.
Stawk přetorhnjeny
Berlin. Stawk pěstowarkow w komunalnych dźěćacych přebywanišćach je přetorhnjeny. Dźěłarnistwo ver.di a komunalni dźěłodawarjo běchu dźensa rano po zwrěšćenju jednanjow zwólniwi, posrědkowanske jednanje zahajić. W tym času njeje dowolene stawkować. Posrědkować ma něhdyši Hannoverski wyši měšćanosta Herbert Schmalstieg.
Budyšin (CS/SN). Za wustup w Budyskej měšćanskej bibliotece je wuměnjenje, zo sy swójsku knihu pisał. Angelika Mann jako žona połna energije je to činiła. Informacija, zo přijědźe znata spěwarka a nětko tež přiběrajcy dźiwadźelenju so wěnowaca Berlinjanka do Budyšina, postara so tuž wo kopatu połnu přednošowansku žurlu biblioteki.
Jitro. Ćežkozranjeny a wulka wěcna škoda staj wuslědk wobchadneho njezboža wčera popołdnju na statnej dróze S 95 mjez Jitrom (Milstrich) a Křidołom (Schiedel). Tam dyrbještaj 62lětny wodźer Forda a 36lětny wodźer Audija čakać, dokelž běštej sej do toho transporteraj tak blisko přišłoj, zo so z lěwymaj špihelomaj dótknyštej. 80lětny šofer Mercedesa pak to po wšěm zdaću přepozdźe spózna a zrazy bjez spinanja do Audija, kotryž bu při tym do před nim čakaceho Forda stłóčeny, a tón do připowěšaka jednoho z transporterow. Na nim stejace awto so tohorunja wobškodźi. Mjeztym zo so wodźer Audija jeno snadnje zrani, dyrbjachu šofera Mercedesa z ćežkimi zranjenjemi do chorownje dowjezć. Škoda wučinja 60 000 eurow.
Łaz (AK/SN). Dohromady 3,5 milionow eurow chce Łazowska gmejna lětsa do wšelakich naprawow inwestować. Ćežišća su centralne přizamknjenje k wopłóčkam w Běłym Chołmcu, Koblicach a Wulkich Ždźarach, dalše saněrowanje Wulkoždźarowskeje zakładneje šule kaž tež naprawy na pućach a při jězorach. Tole wuchadźa z hospodarskeho plana, kotryž su gmejnscy radźićeljo nětko wobzamknyli.
Runja druhim komunam načinjeja žadane wotpisanja tež we Łazu wulke starosće. Pod smužku hospodarskeho plana steji deficit 277 000 eurow. Po słowach komornicy Mandy Liepert tež přichodne lěta žadyn wurunany etat njezměja. Stanje-li so to dwójce za sobu a su-li wšitke zalutowanske a dochodowe móžnosće wučerpane, ma gmejna hospodarski strukturny koncept zdźěłać, kaž komornica rozłoži.
Kulow (AK/SN). Po Mariji Popjelinej dóstanje město Kulow dalšu dnjowu mać za zastaranje dźěći. Wot septembra nastupi Katrin Welsowa swoju słužbu w Brěžkach. Jednohłósnje su ju měšćanscy radźićeljo do systema hladanja dźěći w měsće přiwzali.
„Marija Popjelina je jako dnjowa mać derje wućežena, chce pak za dwě lěće přestać“, rozłožuje Kulowska zamołwita za dźěćace a młodźinske dźěło Beate Hufnagel. „Je tuž wažne so sčasom za naslědnicu rozhladować. Starši sej dnjowe maćerje swójbneho wobchadźenja dla jara waža. To chcemy wobchować.“