Krótkopowěsće (11.11.21)
„Eksponencielny rozrost“
Budyšin/Zhorjelc. Wokrjes Budyšin informuje, zo mnóstwo natyknjenjow z koronawirusom „eksponencielnje přiběra“. Wčera zwěsćichu 853 nowoinfekcijow, incidenca tu je po Roberta Kochowym instituće 769,1. W Zhorjelskim wokrjesu zličichu 466 dalšich natyknjenjow a tři smjertne pady. Incidenca tam wučinja aktualnje 533,6.
Astronawća skónčnje wotlećeli
Cape Canaveral. Po wjacekróć špatneho wjedra dla přesunjenym terminje je ISS-ekspedicija 66 zaběžała. Dźensa rano wotleća raketa typa Falcon 9 ze swětnišćowej łódźu Crew Dragon z Floridy. Mjez astronawtami, kotřiž wotnětka poł lěta na swětnišćowej staciji ISS přebywaja, je tež Němc Matthias Maurer.
Modelowy koncept pře koronu
Nowy wobchod w tymle času kaž žohnowanje
Bart (WL/SN). Wot kónca oktobra je Bart w Malešanskej gmejnje wo atrakciju bohatši. Mjeztym zo je z mnohich městnow słyšeć, zo předawanske abo posłužbowe zarjadnišća na wsach zawěraja, je Marie Rietscher ze swojim zeleninowym wobchodom a sobudźěłaćerku z Budyšina na Bartsku Hłownu dróhu čo. 14 přećahnyła. Tale adresa je hižo lětdźesatki z wikowanjom zwjazana. Něhdy bě to wjesny wobchod, kotryž je za čas NDR HO přewzała, doniž so tam swěcy njehasnychu.
Prózdny wobchod Mariji Rietscher napadny. Po měsacach planowanja, wobstaranja kreditow a přetwara kónc oktobra skónčnje tak daloko bě. Žiwidłowe wiki, kajkež mjez Wósporkom a Budyšinom swojeho runjeća pytaja, móžachu wočinić. Za to njedźakuje so 29lětna jeno swojej swójbje, ale tež mnohim Barćanam, kotřiž su so ze swojim darom na ponowjenju małeho wobchoda wobdźělili.
Korektura
Wotpinanaj wudźiłoj
Adwentne wiki budu
Gmejnska rada so na termin wólbow wjesnjanosty dojednała
Njeswačidło (JK/SN). Po tym zo su lětsa w Njeswačanskej gmejnje chodojtypalenje, swjedźeń swětła a mnohe dalše zjawne zarjadowanja korony dla wupadnyli, chcedźa znajmjeńša tradicionalne adwentne wiki přewjesć. K tomu zetka so wjesnjanosta Gerd Schuster (CDU) jutře hišće raz ze zastupjerjemi towarstwa Přećeljo domizny a kultury a sportoweho zjednoćenstwa, zo bychu sej organizatoriske nadrobnosće dorěčeli. Po namjeće radźićela dr. Dietricha Buttera chcedźa tež wohnjowych wobornikow sobu zapřijeć, dokelž maja woni hodowne wiki nastupajo dosć dobre nazhonjenja. Tež rumpodicha chcedźa sej hišće wobstarać, trěbnu drastu hižo maja, kaž Schuster wčera rjekny. Na kóncu wšak rozsudźa aktualna situacija a wotpowědne rjadowanja wokrjesa korony dla. Ale na někajke wašnje chcedźa wiki přiwšěm přewjesć, tež hdyž snano w něšto mjeńšim wobłuku, hač su to zwučeni. Wjesnjenjo su wotpowědne próstwy hižo zwuraznili a chcedźa po swojich mocach k poradźenju přinošować.
Policija (10.11.21)
Z wobchoda do jastwa
Kamjenc. 46lětny muž je předwčerawšim wječor w Kamjencu z předawanišća direktnje do jastwa zaćahnył, dokelž bě we wobchodźe žiwidła w hódnoće 50 eurow kradnył. Přistajeni drje to pytnychu, jim napřećo pak so paduch agresiwnje zadźerža. Wołachu tuž policiju wo pomoc. Při přepruwowanju zastojnicy zwěsćichu, zo přećiwo mužej dwaj wukazaj zajeća předležeštej. Dokelž 46lětny žadanu třicyfrowu sumu pjenjez zwjesć njemóžeše, dowjezechu jeho po runym puću do jastwa.
Na jubilejny koncert
Bjez kredita drje njepóńdźe
Dalše saněrowanje Šule Ćišinskeho je wokomiknje najwjetše twarnišćo gmejny Pančicy-Kukow. Předwidźane pjenjezy za tuchwilny twarski wotrězk pak njedosahaja.
Pančicy-Kukow (SN/MW). W Pančičansko-Kukowskej Šuli Ćišinskeho sej twarscy dźěłaćerjo tuchwilu takrjec mjez sobu durje wočinjeja. Kładźerjo kachlicow tam runje tak dźěłaja kaž suchotwarcy a instalaterojo tepjenja. To je tež wjesnjanosta Markus Kreuz (CDU) na zašłym posedźenju gmejnskeje rady chwalobnje wuzběhnył. Hladajo na pjenjezy pak wón trochu starosćiwje do přichoda hlada.
