Wjes ma zaso mlokowu rampu
Mlokowe rampy běchu něhdy woblubowane zetkanišća na wsach. Dźensa wone wo wjesnych stawiznach swědča. Dźakowano mnohim pilnym akteram w Złyčinje nětko zaso rampa na nawsy steji.
Złyčin (AK/SN). Štyri stołpy ze zornowca dyrbja hłuboko do zemje. Gerd Haustein z twarskeho zawoda Łazowskeje gmejny je z traktorom skedźbnje přiwjeze. Kolega Gerald Tronnier jeho podpěruje.
Złyčinjanaj Udo Steglich a Reinhard Melcher staj zornowcowe stołpy zańdźeny pjatk do zemje zbiłoj, při čimž dyrbještaj zas a zaso korigować a pruwować. Na to su je z drjewom a šrubami zawěsćili. Po mnohich lětach w Złyčinje nětko zaso mlokowa rampa steji. Wjesny chronist Reinhard Melcher a wobydler Ulrich Behns měještaj ideju za to. Melcher je někotre kany přidał. „Zachowamy tak kruch stawiznow. Naslědne generacije maja wo tym zhonić. Wone njeměli mlokowu rampu jeničce z muzeja abo wučbnicow znać“, měni Udo Steglich.
Njetopyrje stop zawinili
Twarske dźěła na Chróšćanskim Božim domje zaso běža
Chrósćicy (SN/JaW). Něšto dnjow po tym zo je wobswětowy zarjad wokrjesa Budyšin minjeny pjatk twarske dźěła při Chróšćanskej farskej cyrkwi nachwilnje zakazał, tam wot wutory zaso dźěłaja. Dodźeržeć pak maja „wěste wuměnjenja“, kaž krajnoradny zarjad na naprašowanje našeho wječornika zdźěli. „W přichodnymaj tydźenjomaj fachowcy wokoło cyrkwje dale róšty stajeja“, zdźěli na naprašowanje zamołwity architekt Marko Dźisławk. Při tym pak dyrbja wobkedźbować, zo trěbne škitne saki při róštach hač do hornjeje etaže njepójšeja, zo njebychu lětanske čary njetopyrjow mylili. Paralelnje „fachowc za njetopyrje cyłu fasadu, wšitke škałoby w njej a ewentuelnje městna, na kotrychž móhli so njetopyrje chować, kontroluje a zwěsći, hač maja tež w muri Božeho domu swoje kwartěry. Na zakładźe swojich zwěsćenjow wón potom dowoli, zo směmy dale twarić, abo wukaza dalši twarski stop. Nimo toho dyrbi njetopyrjowy fachowc wotnětka cyłe twarske naprawy přewodźeć“, Dźisławk wuswětli.
Woblubowane wiki lětsa zaso su
Rampy su w modźe
Krótkopowěsće (07.05.21)
Bórze 2 000 zemrětych
Budyšin. Ličba 1953 w zwisku z koronawirusom dotal zemrětych w Hornjej Łužicy bliži so hódnoće 2 000. Budyski wokrjes wozjewi hač do wčerawšeho jedyn smjertny pad a 187 dalšich natyknjenjow, Zhorjelski 118 infekcijow a štyrjoch zemrětych z časa wot 21. do 28. apryla. Za wobaj wokrjesaj podawa RKI dźensa zwyšenu tydźensku incidencu, za Budyski 212,2 a za Zhorjelski 191,5.
Žadyn dalši kandidat
Pančicy-Kukow. Za wólby wjesnjanosty gmejny Pančicy-Kukow 11. julija maja jenož jednoho požadarja. Je to dotalny wjesnjanosta Markus Kreuz (CDU). Hač do wčera postajeneho termina njebu dalša kandidatura přizjewjena. Markusa Kreuza bě tamniša wjesna skupina CDU nominowała. Dalšich kandidatow smědźa wolerjo na wólbnym dnju na wólbnym lisćiku napisać.
14 700 žonow prěnje dźěćo měło
Kamjenc. W Sakskej je loni něhdźe 14 700 žonow swoje prěnje dźěćo porodźiło. Maćerje běchu přerěznje 29,7 lět. Tak je so staroba prěni raz porodźacych wot 29,6 předloni snadnje zwyšiła, kaž Kamjenski statistiski krajny zarjad informuje. Za 9 680 prěnjonarodźenych bě porod po dnju maćerje, jich maćerje jón tuž lětsa prěni raz swjeća.
Policija (06.05.21)
Pilota slepili
Halštrow. Dotal njeznaći su wutoru w nocy z laserowym pokazowakom pilota helikoptera sakskeje policije slepili, kotryž bě nad awtodróhu A 4 pola Porchowa po puću. Wužiwanej laseraj běštej jara intensiwnej a swěćeštej ze směra Halštrowa na helikopter. Najebać wohroženje je so tón wěsće na zepěranišćo wróćił. Bjez wuspěcha wostachu zastojnicy, kotřiž za podhladnymi pytachu.
Lětacy trampolin
Kamjenc. Chětro nastróžił je so šofer linijoweho busa w Kamjencu, jako wón wutoru popołdnju swoju jězbu zakónči. Na wotbóčce Macherowa/Hansa Gradowa je lětacy trampolin do busa zrazył. Wichor bě nastroj do toho na přestrjeni předewzaća ze zakótwjenja wutorhnył. Lětacy objekt wobškodźi wokno a motorowu hawbu busa.
Wodźer awta wopak šaltował
Słona Boršć. Na wotpočnišću Hornja Łužica na A 4 pola Słoneje Boršće je tohorunja wutoru popołdnju 84lětny muž z awtom marki Ford Transit do twarjenja zastanišća zrazył. Po wšěm zdaću bě so wón w awtomatiskim šaltowanju mylił. Po prěnim trochowanju wučinja cyłkowna škoda něhdźe 10 000 eurow.
„Swěrny přewodnik“ za kubłanišćo
Smochćicy (SN). W biskopstwje Drježdźany-Mišno jězdźi nowy BONI-bus. Smochčanske kubłanišćo swj. Bena dósta jón wot Bonifacijoweho skutka katolikow Němskeje, kotryž ma swoje sydło w Paderbornje. Kanonik dr. Bernhard Dittrich a nawoda zarjadnistwa Smochčanskeho kubłanišća Thomas Kadenbach staj tam jězdźidło wotewzałoj.
„Naše busy zwjazuja ludźi, dokelž su swěrni přewodnicy za farske wosady a zarjadnišća cyrkwje w regionach diaspory, kotrež Bonifacijowy skutk spěchuje. Wone su widźomne znamjo solidarity za jednu cyrkej, kiž pohibuje a zwjazuje“, rjekny generalny sekretar skutka, monsignore Georg Austen.
Bonifacijowy skutk podpěruje nakup tajkeho BONI-busa po dwěmaj třećinomaj kóštow za farske wosady a cyrkwinske zarjadnišća w diaspornych regionach z podźělom katolikow hač do 20 procentow.
Lětsa dwě mejiw Němcach
Loni bě Němčanski młodźinski klub wulke wubědźowanje wo najrjeńšu mejku organizował. Tak mějachmy nahladnu ličbu 21 mejkow. Lětsa bě tomu cyle hinak. Póndźelu na pózdnim popołdnju su mužojo na zahrodźe Kummerec swójby krasnu meju přihotowali. Dokelž njemějachu serbsku chorhoj, přijědźechu ke mni, a móžach jim wupomhać. Nětko tajka nad Kummerec zahrodu zmawuje.
Dalšu meju mamy na wjesnym swjedźenišću, nic tajku wysoku kaž hewak, ale tohorunja ze serbskej chorhoju pyšenu. Někotři młodostni běchu so na koronu testować dali, a móžachu na te wašnje tradiciju zachować. Mamy tuž lětsa w Němcach dwě meji. Foto: Achim Nowak
Planuja wotnětka wosebity projekt
Bóščanska gmejnska rada a wjesnjanosta Stanij Ryćer planujetaj přichodnje tójšto, štož žiwjensku kwalitu wobydlerjow we wšitkich gmejnje přisłušacych wsach polěpši.
Bóšicy (SN/MiR). Gmejnska rada Bóšicy je so na swojim wčerawšim posedźenju w tamnišej gratowni na to dojednała, přewjesć lětuše wólby wjesnjanosty 21. nowembra. Amtěrowacy wjesnjanosta Stanij Ryćer (rjemjesło Bóšicy) bu 27. januara 2008 prěni króć ze 97 procentami hłosow za wjesnjanostu wuzwoleny a 23. nowembra 2014 z 58 procentami hłosow na dalše sydom lět w zastojnstwje wobkrućeny.
Namjetowanemu terminej za lětuše wólby radźićeljo wčera jednohłósnje přihłosowachu. Stanij Ryćer zwurazni, zo chce znowa nastupić a na dobro gmejny dalše sydom lět skutkować. Na to wothłosowachu radźićeljo wo wosobach, kotrež maja we wólbnym wuběrku skutkować a wólby přihotować.
Wysokonasypy zachować
Chcedźa w Mułkecach přirodu a bohatosć družin škitać
Slepo (AK/SN). Wobydlerjo gmejny Slepo spjećuja so planam za twar wulkeje fotowoltaikoweje připrawy w Mułkecach. Wjace hač 80 wobydlerjow, přewažnje ze Slepoho, Mułkec a Rownoho, je wutoru do posedźenja gmejnskeje rady před Serbskim kulturnym centrumom demonstrowało. Ludźo chcedźa Mułkečanske wysokonasypy, hdźež ma připrawa nastać, z jeho přirodu a bohatosću družin škitać a zachować. Woni dwěluja na trajnym wužitku solarnych připrawow za Slepjansku gmejnu, za předewzaća a wobydlerjow. Na próstwu gmejnskeho radźićela Marca Jainscha (CDU) su tuž předwčerawšim štyri problematiku nastupace dypki z dnjoweho porjada wzali.
