Dalše spěšnotesty

Budyšin. Darmotne spěšnotesty za ludnosć přichodnu wutoru popołdnju a štwórtk dopołdnja w Kamjencu kaž tež srjedu we Wojerecach zmóžnja Budyski wokrjes. Tam zwěsćichu wčera 39 koronanatyknjenjow a dwaj smjertnej padaj. Incidenca wučinješe 88,33, RKI mjenuje dźensa 73,1. We wokrjesu Zhorjelc bě ­wčera 53 infekcijow, z toho 21 britiskeje mutacije, incidenca bě 104,46, po RKI 92,6.

Wšitcy zajimcy přeprošeni

Wojerecy. Swjatočnje wotkryta budźe nowa wopomnjenska tafla „W tymle domje załožichu 24.7.1921 župy Domowiny, Zwjazka Łužiskich Serbow“ při radnej pincy we Wojerecach prózdnin dla hižo sobotu, 17. julija, a to z małym serbskim zarjadowanjom za wšěch zajimcow. Wo tym informowachu tele dny na posedźenju předsydstwa Wojerowskeje župy „Handrij Zejler“.

Krajny rada zadźiwany

Za mjezsobne zrozumjenje stej zmužitosć a sćerpnosć trěbnej

Wjacore lěta hižo pućuje Konječan Markus­ Bjeńš mjez Łužicu a Južnej Afriku­. W sćěhowacym rozmysluje wón wo motiwach čłowječeho jednanja. Tu­le­ slěduje dalši z rjadu jeho přinoškow w Serbskich Nowinach k socialnym temam.

Dowěra je njeparujomny zakład spo­móžnych čłowjeskich poćahow. Kóždy dźeń njeličomne razy sobučłowjekam dowěrjamy. Z awtom po puću tamnym wobchadnym wobdźělnikam dowěrjamy, zo maja so po płaćiwych prawidłach. Na dźěle so dowěrliwje na to spušćamy, zo kolegojo swoje nadawki swědomiće spjelnjeja a tak k docpěću zhromadnych zaměrow přinošuja. Hdyž někomu něšto požčimy, činimy to w dowěrje, zo nam požčenu wěc zaso wróći. Samo hdyž zrěče­nje podpisamy, tomu dowěrjamy, zo so kóžda strona po nim ma. Jeli pak so dowěra znjewužiwa, smy zrudźeni, snano tež zludani, w najhóršim padźe rozhněwani. Jónu přesłapjeny čłowjek je kedź­bliwiši, wšako nochce, zo so po­dawk wospjetuje. Znjewužiwana dowěra z wěstosću čłowjeskim poćaham škodźi. Bjez dowěry potajkim čłowjeske žiwjenje móžne njeje.

Njebjelčicy. Tak kaž so lětsa žane ju­­trow­ne wiki njewotměja, dyrbja tež debjenje jutrownych jejkow wotprajić, kotrež su hewak na mnohich městnach pře­wjedowali. K tomu słuša tež wóskowanje jejkow z Marju Šefrichowej w Njebjelčicach. Kaž tamniše gmejnske zarjadnistwo zdźěli, stanje so tele zet­kanje z woporom koronoweje pandemije. Wšitkim, kotřiž chcedźa so přiwšěm sami w de­bjenju jutrownych jejkow pospytać, po­ručeja sej w Njebjelčanskim wjesnym wobchodźe za to trěbne utensilije wobstarać.

Wupožčowanje dale móžne

Budyšin. Lockdowna dla je Budyska měšćanska biblioteka drje dale zawrjena, přiwšěm móža sej tam zajimcy dale knihi,­ filmy, CDje, časopisy a dalše me­dije wupožčować. Na internetnej stronje biblioteki, hdźež je wšón bohaty poskitk­ widźeć, hodźi so kniha, zynkonošak atd. telefonisce abo e-mailnje skazać a k dojednanemu terminej wotewzać. Kak to wšo funguje, zhonja zajimcy pod www.stadtbibliothek-bautzen.de.

Třělby kradnyli

Mikow. Njewšědnu rubiznu wupytali běchu sej njeznaći minjene dny w Mikowje (Mücka). W času wot pjatka popołdnja hač do wutory ranja zadobychu so tam do bydlenskeho domu. Přepytawši wšitke rumnosće pak njejsu pjenjezy abo debjenki sobu wzali, ale tři třělby w cyłkownej hódnoće něhdźe 3 000 eurow. Jako wotpowědny kamor namócnje wočinichu, načinichu nimo toho něhdźe 2 000 eurow wěcneje škody.

Drogi namakali

Kamjenc. Podhladneho kolesowarja chcychu policisća předwčerawšim wječor na Wojerowskej dróze w Kamjencu kontrolować. Tón drje najprjedy ćekny, ­dźakowano pokiwam wobydlerjow pak jeho pozdźišo w bydlenju znateho hromadźe z dalšimaj mužomaj lepichu. Tam wuhladachu ­zastojnicy na blidźe wjacore titki marihuany. Tak hišće dalšej bydleni w Lessingowym měsće přepytachu, hdźež ­su tohorunja drogi, zapakowanski material a za to trěbne utensilije zwěsćili. Wšitko to kaž tež mobilny telefon a kontowe wućahi policisća sćazachu. Wšitcy třo změja so nětko přeńdźenja přećiwo ­zakonjej wo wopojnych srědkach sudnisce zamołwić.