Nuknica (SN/bn). Za přichodny kónc tydźenja, dokładnje sobotu, 13. januara, přeprošatej Nukničanski wjesny klub a wjesne zhromadźenstwo „NuPraKo“ zaso do Brězanec bróžnje na jolku. Lětsa swjeći­ „najwjetši ryzy serbski swjedźeń“, kaž jón zarjadowarjo mjenuja, 20. narodniny. Pod hesłom „Tajki cirkus“ smědźa so wopytowarjo na titulej wotpowědowacy pisany program wjeselić. A kaž je na tajkich narodninach – ćim bóle na kulojtych – z wašnjom, čaka tójšto překwapjenkow na publikum. Organizatorojo nochcedźa wuzamknyć, zo někotružkuli chłóšćenku minjenych lět na někajkežkuli wašnje znowa na jewišću pokazaja. Mjez druhim je skupina SG Sněhowka wosebity přinošk spřihoto­wała. Tež kabaretne sceny su z wobstatkom programa – přiwšěm zarjadowarjo po zwučenym wašnju ke konkretnym wobsaham wutrajnje mjelča.