Šansy iniciatiwy za polěpšenje serbskich rěčnych rumow rozjimać
Choćebuz (SN/at). „Domowina podpěruje ludowy namjet za zhromadnu šulu w Sakskej. Budźe-li iniciatiwa wuspěšna, móhła wona tež serbskemu ludej šansu skićić, zhromadnosć wšěch dźěći a młodostnych na kubłanišćach a w jich wokolinje lěpje a dlěje pěstować. Domowina by swoju pomoc při koordinaciji mjezsobneho wothłosowanja poskićiła.“ To je zwjazkowe předsydstwo serbskeho třěšneho zwjazka pjatk w Choćebuzu wobzamknyło. Při tym njebě čłonam zwjazkoweho předsydstwa rozsud lochki. Wuběrk za kubłanje a młodźinu bě přehlad serbskich šulow a jich nošerjow zestajał a někotre argumenty za ludowy namjet a přećiwo njemu podał.