Nimale połčas w přihotach na přichodnu premjeru

srjeda, 06. februara 2019
artikl hódnoćić
(0 )
Pod režiju Petry-Marije Bulankec-Wenceloweje (nalěwo) zwučuja hrajerjo lajskeje dźiwadłoweje skupiny Šunow-Konjecy za přichodnu inscenaciju. Nazymu chcedźa hru „Ludźo, njedźiwajće so“ prěni raz předstajić.  Foto: Feliks Haza Pod režiju Petry-Marije Bulankec-Wenceloweje (nalěwo) zwučuja hrajerjo lajskeje dźiwadłoweje skupiny Šunow-Konjecy za přichodnu inscenaciju. Nazymu chcedźa hru „Ludźo, njedźiwajće so“ prěni raz předstajić. Foto: Feliks Haza

Konjecy (SN/bn). Mjeztym hižo nimale poł lěta zwučuja hrajerki a hrajerjo lajskeje dźiwadłoweje skupiny Šunow-Konjecy za nazymu planowanu premjeru 16. inscenacije cyłka. „Ludźo, njedźiwajće so“ rěka hra z pjera Franza Riedera, z kotrejž chcedźa přihladowarjow cyłkownje dźesać króć přeswědčić. Wo přełožk němskeho originala staj so Regina Šołćina a wospjet Daniel Wjenk po­starałoj. Režiju wukonja znowa hrajerka Němsko-Serbskeho ludoweho dźiwadła Petra-Marija Bulankec-Wencelowa.

Dohromady dźesać čłonkow a čłonow agěruje na jewišću. Tamni sobustawojo přewozmu nadawki na přikład na polu wobswětlenskeje a zwukoweje techniki, suflěruja abo kasěruja zastupny pjenjez. „Wuhotowanje jewišća smy lětsa dospołnje sami zwoprawdźili. Tež wšitke kostimy a rekwizity su ze swójskeho wobsydstwa“, předsyda skupiny Daniel Wjenk rozłoži. Wo kruchu samym chce smějkotajo so jenož rjec, zo „jedna so wo komediju. Wjace njesměm a njemóžu přeradźić. Přihladowarjo njech dadźa so překwapić.“

wozjewjene w: Towarstwa
Prošu přizjewće so, chceće-li komentar podać

nawěšk

nowostki LND