Budyšin (SN/bn). Podźakowawši so za „čestnohamtske skutkowanje na bazy“ zahaji Dawid Statnik wčerawše wuradźowanje předsydy Domowiny ze zastupjerjemi předsydstwow župow a čłonskich towarstwow třěšneho zwjazka Łužiskich Serbow w Budyskim Serbskim domje. Dnjowy porjad wopřijimaše mjez druhim naćisk noweho programa Domowiny, kotryž bu njedawno wozjewjeny. Statnik nadźija so w tym zwisku „čiłeje diskusije“ a namołwi nimo čłonstwa zwjazka wuraznje „tež akterow zwonka Domowiny“, so na procesu, sformulować doskónčnu wersiju, wobdźělić. Wjetšina župow a towarstwow chce namjety internje zdźěłać; móžne temy su digitalizacija kaž tež zapřijeć „kubłanje a skrućenje narodneho wědomja“ do dokumenta. Dalše ćežišćo bě klětuša hłowna a wólbna zhromadźizna, kotruž chcedźa po słowach Statnika „kompaktnišo a snano za tematiskimi blidami“ wuhotować. Župy a towarstwa měli „delegatow dočasnje pomjenować a kandidatow za předsydstwo nominować“. Procedere bu mjeztym „prawnisce pruwowany a wotpowěduje wustawkam“.