Budyšin (SN/at). Mnohe Domowinske skupiny a towarstwa pod třěchu Budyskeje župy „Jan Arnošt Smoler“ trjebaja podpěru při organizaciji zarjadowanjow. Što móhło to konkretnje być, wo tym je so župne předsydstwo z jich zastupjerjemi hižo w měrcu w Radworskim dwórnišću wuměniło. Wšitke cyłki tehdy přitomne njeběchu, předsydstwo pak tež jich měnjenje a wočakowanja zajimuja.

W měrcu zahajenu analyzu dokónčić rěka, zo čłonka abo čłon župneho předsydstwa „jedyn ze zbywacych pjeć cyłkow w přichodnych měsacach wopyta“, rjekny županka Leńka Thomasowa po wčerawšim wuradźowanju gremija, a z nimi – kaž na přikład w Lemišowje abo Jaseńcy – wuměnu pokročuje. Wědźa, zo mnozy skupinarjo staroby dla sej wjace njepřicpěwaja wšelake zarjadowanja sami organizować. „Wěmy pak tež, zo woni sej serbsku bjesadu we wobłuku Domowinskeje skupiny abo towarstwa dale jara waža a tam rady chodźa“, wujasni Katja Lizarnjec, regionalna rěčnica Domowiny za teritorij župy. Analyza ma zwěsćić, za čo podpěru wočakuja, hač su to přednoški, wulět abo dalše formy zarjadowanjow.