Wojerecy (SN/mb). Najebać horcotu su čłonojo předsydstwa župy „Handrij Zejler“ a zastupjerjo župy „Delnja Łužicy“ wčera popołdnju w bróžni na zahrodźe domu Domowiny we Wojerecach dwě hodźinje dołho čile wo zhromadnych wužadanjach wuradźowali. Wojerowska županka Gabriela Linakowa witaše župana ze susodneho zwjazkoweho kraja dr. Pětša Šurmana, jednaćela Domowiny z Delnjeje Łužicy, Marcusa Końcarja, a regionalnu rěčnicu Heike Apeltowu do Wojerec. Linakowa zwurazni, zo chcedźa „jako geografisce centralna župa mosto­twarcy mjez Hornjej a Delnjej Łužicu“ być.