Lětsa je tomu sto lět, zo prezentowaše so sportowy cyłk serbskej a mjezynarodnej zjawnosći

W dźěławosći Serbskeho Sokoła mjez 1920 a 1933 běchu wšotowarstwowy zlět 1924 w Pančicach-Kukowje, 1927 we Wulkim Ćisku a 1931 w Radworju nimo zajězdow do Prahi 1926 a 1932, Skopja 1928, Poznanja 1929 a Běłohroda 1930 wusahowace podawki. Wšě tute wjerški přinošowachu k mjezsobnej zwjazanosći, ale tež k potwjerdźenju narodneho wědomja a hordosći na ćělne wukony. Mnohe ćeže dyrbjachu so přewinyć. Do zlěta w „Klóštrje“ mějachu najprjedy hinaše předstawy za termin. Najprjedy bě předwidźane, zlět tydźenjej po prěnim zjawnym wustupje Sokoła na zjězdźe Domowiny w Chwaćicach přewjesć. Tohorunja dyrbjachu so dalše prašenja rozrisać: Kak zawěsćić jednotnu choreografiju za planowany zhromadny wustup z kijemi (tehdy pisachu „z styčkami“ po čěšćinje), kak derje wuhotować zwučowanišćo, kak dobyć dosć pomocnikow za organizo­wanje wotběha.